Ta con importante Serlimar ta? Ta tanto presion tin asina riba e maneho di desperdicio di nos isla? Of ta e negoshi tras di recogemento y procesamento di desperdicio ta e motibo real dicon e presion di Otmar Oduber pa regla cosnan den Serlimar? Despues cu MEP a perde un asiento debi na salida di Daphne Lejuez di MEP, awor ta POR no kier traha mas cu su mesun Minister, esta Marisol Lopez-Tromp.
Den e fin di siman aki, dirigentenan politico na Aruba ta analisando strategianan di con pa interpreta e movecion di POR. E ta un asunto masha cuestionabel ora un solo persona, cu de faco ta doño di e partido politico, por destabilisa henter un Gobierno debi cu e no ta haya su “kier” o sea cu e Minister cu el a pone eynan no ta cumpli cu su deseonan of ordonan. E ta un desaroyo nobo cu sin duda Gobierno di Hulanda via Gobernador ta analisando di masha cerca, pa evita cu poder economico ta tuma gobernacion over di nos pais.
Andin Bikker, un amigo di hopi aña di Marisol Lopez, a djis tir’e bou bus, lag’e cay manera un patia berde y asina para na banda di Otmar Oduber den e guera pa saca Tromp for di partido y for di Gobierno. E motibonan cu a menciona no a convence ningun hende y hopi awe ta pura pa Minister Tromp yama su conferencia di prensa pa eynan anuncia e motibonan real cu ta nan so sa. Lo mester tin asuntonan cu Tromp a topa cu ne cu no por mira luz di dia.
Un cos ta sigur, pocopoco ta cerando e cura rond di e hechonan y mescos cu kehonan ta drentando un tras di otro na Ministerio Publico, ta nota tambe cu Gobierno di Hulanda tambe ta cuminsa sigui desaroyonan politico di masha cerca na Aruba. No por ta asina cu Hulanda ta mandando placa tur luna pa wanta Aruba na bida y aki nos politiconan ta casi basha Gobierno abou pasobra e Minister no ta contesta whatsappnan di su lider.
