Recientemente Sindicato SEPPA a ricibi informacion di su miembronan cu ta traha como werkster na SKOA cu Minister di Enseñansa kier cambia nan areglo di salario atrobe. Ta apenas 6 aña pasa cu a regla pa porfin werksternan a bira “Ambtenaar”, cu e mesun salario y beneficionan secundario. Pero, parce cu a presenta un discucion awor entre e fundacion SKOA y e Minister.
“Un berdad tin, cu den e bay bin entre Minister y SKOA, esunnan cu ta sali perhudica ta e werksternan. Trahadonan humilde cu no tin nada di haber cu desicionnan di Gobierno of cu pa falta di regla cosnan na un manera corecto ta wordo perhudica”, asina Sindicato SEPPA a informa. “Si e fayo ta cu mester cambia nos reglanan of leynan vigente, anto haci’e. Pero uzando e argumento aki, pa baha gasto ta un acto baho”.
Un par di aña atras, despues di un lucha largo di werksternan, porfin na aña 2014 a regla e asunto di nan salario, cu a keda atras desde 1990. Gobierno e tempo ey a cera un protocol cu sindicatonan, cu tur arbeider y werksternan lo bira ambtenaar. A keda cla cu e sistema di salario di e arbeidernan pero di e werksternan semper a keda atras. E tabata un lucha largo di añanan 90 te cu na 2014 porfin a keda cla cu e salario nobo pa e werksternan. Salarionan a mehora, pero tambe e werksternan aki a haya e mesun condicionnan secundario di empleadonan publico. Sistema di salario nobo cu a bin conta pa tur werksternan cu ta traha den Gobierno y den fundacionnan.
Pa colmo SEPPA ta notando mas maniobranan. Nan sa cu situacion financiero di SKOA no ta mucho bon. Kiermeen poniendo SKOA bao presion pa debolbe e placa paga aki na e werksternan, ora ta Gobierno mes a duna aprobacion, ta mustra den direccion di persecucion. SKOA ta e fundacion cu ta maneha e mayor cantidad di scolnan na Aruba. “Nos ta den un crisis y awor ta pone e tipo di presionnan aki pa SKOA di su banda bira kita e hende muhenan aki humilde for di trabao?”, asina Magaly Brito di SEPPA ta puntra.
Esaki mientras cu awe mas cu nunca, scolnan mester di e trahadonan aki, nan ta escencial y indispensabel den e protocol y guia pa luganan di trabao limpi. Scolnan na Aruba mester di e werksternan y ta exigi pa en bes di mas problema, traha na un solucion den cual werksternan no ta sali perhudica.
