Sindicato SEPPA, cu ta representa mayoria di trahadonan den sector publico, ta yama un reunion urgente cu werksternan.
Esaki relaciona cu problema cu nan a confronta cu ne debi na decisionnan tuma door di minister di enseñansa relaciona cu e subsidio pa SKOA.
E problemanan a cuminsa ora cu minister a manda carta pa fundacion SKOA y informa nan cu lo no subsidia cierto gastonan mas y debolbe cierto suma bek. E decision aki a crea un problema pa e fundacion, ya cu e suma acumula a bira hopi grandi. SKOA no ta haya e placa aki pa pago di cierto beneficionan cu werkster ta gosa di dje.
Na 2015 minister di enseñansa a traha un MB y a informa SKOA cu lo cierto beneficionan cu e trahadonan tin ta bay cay den e suma cu ta duna como subsidio.
Pa hopi aña, Magaly Brito a splica, a bin ta luchando pa trece igualdad bou di e werksternan, cu no tabata haya ningun beneficio y nan salarionan a keda atras. Na 2014 a logra yega na un rangenstelsel cu ta valido pa tur werkster trahando na e diferente fundacionnan. SKOA a cumpli cu e pagonan aki, te ora cu a haya e carta for di e actual minister di enseñansa.
Na inicio di 2020 e fundacion a bay Corte y a perde. Pero ainda tin un caso den bodemprocedure, cu ta un proceso mas largo pa analisa tur documento y mira kende tin rason. E caso di 2020 tabata pasobra kier a para cierto medidanan cu nan a pensa cu e mandatario lo bay tuma.
SKOA mientrastanto a informa SEPPA, cu si no tin cambio den e maneho di e minister, ta haya nan mes obliga di kita werksternan for di trabou pa motibo cu no por cubri e gastonan aki. Scolnan sin werkster lo crea un problema grandi pa e scolnan . Hustamente awo den un pandemia unda limpiesa ta hopi importante. Esaki ta motibo cu ta yama un reunion cu tur werksternan pa informa nan riba e decision y mira kico ta e siguiente paso.
SEPPA a trata di papia cu partidonan pa reconsidera e maneho. Ta parce cu kier pasa e trabou aki pa un tercer partido, lubidando cu e hendenan aki tin derecho riba yn trabou tambe.