SEPPA y TOPA ta na mesa cu gobierno. Nan ta representa e trahadonandi Imigracion y no STA. STA no por papia den nomber di e trahadonan di Imigracion pasobra nan no tin representacion di nan.
Edmundo Marlin a splica cu na Imigracion tin dos situacion ta tumando luga: 1. Ta e keho di e trahadonan di Imigracion di e forma di proceder di management team. E di dos ta e formatierapport.
Ora cu cuminsa cu e prome keho di e trahadonan, trahadonan tin hopi keho riba e forma di proceder di management team, e forma con nan ta wordo trata, cosnan ta tumando luga cu no ta suppose di tuma luga den e forma coriente.
Reaccion di Sindicato SEPPA relaciona cu situacion na Migracion
Posted by 24ora on Monday, May 20, 2019
E trahadonan ta sinti cu nan no ta wordo respeta pa e management team y e trahadonan ta e exigiendo esaki.
Trahadonan a formula un carta, cual nan a dirigi na minister, informando di tur e sucedidonan cu ta tumando luga na pia di trabao na Imigracion. Tabata tin un reunion siman pasa cu minister, caminda cu a splica minister cu el a ricibi un carta di e kehonan y kier pa minister diligentemente atende cu e carta aki pa evita cu mañan algo cu nan por bay lamenta sosode. Tin tension enorme na Imigracion awor aki y e trahadonan nan no ta bay wanta cu e situacion si e sigui asina manera e ta bayendo.
E di dos ta e formatierapport. Segun Edmundo Marlin, e formatierapport ta un rapport cu gobierno a entrega por medio di DRH, na e sindicatonan pa bay discuti. E concepto cu tin ta un concepto cu minister, Andin Bikker a duna su bendicion. E concepto ey a sinta discuti’e cun’e y cu management team, esta Trudy Hassel tabata den reunion cu DRH caminda cu a discuti e concepto.
Pero aparentemente Hassel tin otro pensamento cu no ta malo, pero awor aki, si kier mantene bo mes na e core business, bo mester mantene bo mes na esun di imigracion y Guarda nos Costa. Cosnan adicional cu e lo kier bin cun’e, a indik’e awor aki no ta posibel. Trudy Hassel ta para riba dje cu e kier e cosnan aki.
Kico ta e situacion awor aki
Despues di a discuti e formatie, Hassel a haya comentario di e sindicatonan. Te cu awe Hassel no a contesta e comentarionan y mandanan bek pa DRH pa asina sigui cu e proceso di e formatie. E trahadonan ta sinti awor aki cu nan ta wordo stroba den e proceso aki.
Kico minister a haci
Minister a haya su mes den un situacion cu e tin un formatie di KIA, e tin un formatie di CEA y e tin un formatie di Imigracion. E cuestion a bin cua ta bay prome. E minister a pone tur tres hunto pa traha riba nan hunto y asina bin cu un solo tipo di bezoldigingsregeling cu ta cuadra pa tur tres.
E problema ta sinta, esun di KIA ta casi cla, esun di CEA ta den besprekking, pero esun di Imigracion, caminda mester a sigui discusion, no a sigui. Dado momento, e minister a tuma e decision pa hala esun di Imigracion, sak’e for di esun di KIA y CEA y lage bay na banda. A bin un otro problema awo, cu tin un discusion andando riba Imigracion y Guarda nos Costa, caminda ora cu SEPPA a cuminsa atende cu e formatie, a bisa minister, tin un formatie na mesa, un concepto, pero si mester bay atende cu e concepto, mester bin cambio pa bin cu un concepto nobo di gobierno, cu minister a duna su aprobacion riba dje. Ta un concepto mester discuti, no dos. Esey ta loke a sosode.
Kico a pasa banda di dje
Guarda nos Costa ta bin den e formatie di Imigracion of e ta bay keda bao di polis. Aparentemente trahadonan a scoge pa e bin bao di Imigracion. E momento cu esey a tuma luga, a bin un concepto caminda cu tin Imigracion y Guarda nos Costa den un formatie caminda cu e minister ta duna su bendicion. Pero awo tin un discusion andando y caminda minister, mirando e situacion cu ta andando awor aki, cu e ponencianan di Trudy Hassel, pa loke ta trata Guarda nos Costa, su ponencianan cu e kier bin cun’e. Minister a dicidi cu e lo bay atende cu Imigracion apart. Ta nifica cu el a bolbe hala nan afo.
Pero e problema ta keda sinta cu tin cu tuma un decision, kico e ta. Nan ta hunto of nan ta separa. Esey ta un, segun Marlin.
E di dos, e preguntanan cu a wordo haci pa sindicatonan den e concepto caminda cu tabata papiando di tur dos hunto, cu e contesta ey, e management team mester a duna, no a duna un contesta con ta sigui. Eynan, den e reunion minister a bisa cu e lo bin cu un petit comite, pa bay atende e formatie aki pa conseh’e. Diaranson awo, ta bay tin un reunion cun’e. Den e reunion ey kier tende prome cos e carta cu a wordo entrega door di e trahadonan, kehonan, kico minister ta bay haci cun’e.
Eynan tin un situacion cu hopi tension. A splica minister duidelijk cu tin cu atende, ta un carta cu a wordo entrega for di dia 8 di April.
Marlin a splica cu e minister tin un carta di mas cu un luna bieu y no por lag’e cosnan ey drumi, caminda cu bo tin problema ta tumando luga entre e trahado cu gerencia y no ta buscando un solucion pa e problemanan aki. E trahadonan ta decidido. A bisa cu tanten cu ta na mesa, ta busca un solucion na mesa. Minister mester actua mas diligente, pasobra si e trahado sinti cu e cos aki ta wordo gerek manera cakiña, nan lo bay tuma un decision.
E momento ey bo ta bay sinti cu tin loke sindicato ta yama “conflict”. Bo sa di un problema, pero bo no ta atendiend’e y a lag’e bir aun conflict. Na momento cu e bira un “conflict”, trahadonan ta bay tuma su pasonan. Esey ta loke e sindicatonan a splica minister duidelijk, pa atende cu e cos aki, pasobra e ta birando un bom. E ta un time bom awor aki. Kico ta bay sosode, cu e momento cu e cos rementa, e ora ey ken su falta. Sindicatonan ta spera cu minister actua.
