Ya nos ta yega e 133 aña di e lucha di e martirnan di Chicago, na unda lidernan sindical a ofrece nan bida pa conkista derecho di trabao di 8 ora, demostrando forza y grandeza. Mientras cu cada biaha ta keda recorda e lucha aki e ta mas cu obvio cu e dia aki cada dia mas ta wordo lubida. Hunto cu e hecho importante aki, nos ta celebra e di 100 aña di ILO – International Labour Organisation. E aña aki nos ta mira preparacionnan grandi tambe pa e celebracion aki
Mundo henter ta recorda e dia aki, dunando muestra di gradicimiento na tur esnan cu a hiba e lucha aki. Nos ta recorda y reflexiona cu hopi alegria cada logro cu ta faborece derecho di trahadornan. Hopi trahador no sa o a lubida sucesonan di un dia manera 1 mei 1886, unda infiltrantenan den seno di trahadornan cu nan calumnianan y redashinan contra lidernan sindical a crea, prome un confusion y después desorden pa habri caminda pa e forsanan policial den un forma brutal y grotesco drenta den un reunion di trahadornan, pa kibra reunion, bati y/o maltrata pa despues mata lidernan sindical y trahadornan den e lucha.
Esaki simplemente pa e lucha cu tabata ser hiba, esta e lidernan sindical y trahadornan solamente tabata kier un horario di trabao di 8 ora pa dia.
E provocacion a causa un confusion enorme y trahadornan tabata core tur caminda buscando forma pa scapa nan bida, pasobra polisnan tabata tira manera loco. Y e instigadornan cu un momento a hasi comosifuera nan tabata companjero di e lucha tabata para un banda ta wak e masacre tuma lugar. Ta hopi hende a wordo mata na e plaza Haymarket na Chicago.
Den e ultimo añanan ta hopi cambio a bin ta tumando lugar na final di e dia e aspecto di placa ta gara mas interes. Asina nos ta haya e cantidad di excusanan ‘no tin placa, pesey no por duna’, ‘pa falta di fondo, mester trece cambio’, pero tambe e trahado cu ta enfrentando e bida cotidiano cu hopi inseguridad ta pone e aspecto placa na promer lugar den su negociacionnan. Algun ta prefera di culpa sindicatonan pa ‘no por logra suficiente’ desconociendo di forma total e pensamento di e trahador cu na final ta tuma e decision y e rumbo di negosacionnan.
Inseguridad di trahador, na lugar di trabao, desconfianza pa futuro !!
E inseguridad, desconfianza cu tin pa con situacion lo ta den futuro ta basta preocupante bao di trahadornan. Situacion na Aruba pa e clase trahador ta keda dificil. Ta un constante lucha pa logra apenas algun beneficionan aki aya pa e trahador. Ta parce cu ainda e situacion economico na nivel mundial ta manera un spirito rond di e clase trahador. E situacion aki ta uno basta hostil. Rond mundo nos ta mira con desempleo ta crece y aki na Aruba ta cuanto ta e trahadornan cu a perde trabao. Ta hopi trahador tin cu no tin trabao drechi y tampoco ta goza di beneficionan laboral drechi. Apenas un salario minimo nada mas !!.
Pero igualmente nos ta mira con na pia di trabao tin hopi violencia ta tumando lugar. No ta pornada nos ta haya cu un comision di docentenan preocupa ta lanta para y mustra riba e violencia cu ta pasa cu nan, kiko nan mester soporta pero mas ainda e inseguridad na pia di trabao reinando, e falta di reconocemento y e balor pa nan trabao, mustrando mas ainda cu den enseñanza ta parce cu tur cos por wordo hasi contra docente y nada ta wordo hasi, no tin sancion contra agresornan mes !!. Pa SEPPA, e grupo aki di docentenan preocupa cu a lanta mas bien mester wordo mira como intentonan pa reenforza e boz di sindicatonan y enfatisa cada biaha loke ta nan realidad na pia di trabao.
Enseñanza ta keda den discusion.
Apenas un aña pasa docentenan y tur otro stakeholders tabata ariba bao pa e hecho cu lo kier pasa nos Skolnan Publico bao di un stichting. Nos ta recorda con docentenan a keda buska claridad y no a para keto !! A lansa e voz di protesta di inmediato y a pone tur cos “on hold”. Pero, durante 1 aña largo, docentenan y tur otro cu igualmente ta traha den e mundo di enseñansa a keda den alerta, vigilando tur e pasonan pa toch sigi den direccion di un stichting. Pa 2019, diripiente ta bin e noticia cu awor kier bin cu un ‘pilot” bao di skolnan publico, unda e orario nobo ta bin riba mesa. E docente atrobe ta haye contra muraya, ora cu nan salario mes ainda ta pega y esakipa basta aña y tampoco no tin miras pa wordo drecha ya cu no tin placa segun gobierno, tambe ora cu grupo di docentenan tambe ta lanta, preocupa pa e cantidad di sucedidonan na pia di trabao, violencia ta bira mas grandi tur dia bao nos hobennan y tambe na skol. Mas y mas keho ta keda drenta di hasta violencia contra docentenan y tin cu keda warda.
100 aña di ILO
Den luna di april e organizacion ILO (International Labour Organization) a cuminsa celebra su di 100 aña di existencia como un organizacion di paz y parti di e tratado di Versaille, despues cu e prome guerra mundial a finaliza. E momentonan ey, uno historico e fundadornan a reconoce cu husticia social ta e base pa por papia di un paz duradero, un contraste total na e loke e trahadornan tabata pasa aden door di tabata wordo explota pa nacionnan mas industrializa den e epoca ey. E tempo aya ya a mira e interdependencia economico di mundo y e necesidad di cooperacion pa tin igualdad den e condicionnan di trabao. Importante ta cu e tempo ey a define un un rumbo mas humano. Asina a cuminsa atende asuntonan importante den un forma tripartite, cu e participacion pleno di gobernantenan, dunadornan di trabao y di trahador.
E tempo ey caba, e negociacionnan tabata sosode y mira den un forma unico ya cu tabata necesario pa e.o.reglamenta e cantidad di ora di trabao, empleo y prevencion di desempleo, proteccion social di trahadornan, preparacion y enseñanza professional pa trahador, etc..
A lo largo di e 100 aña di ILO nos ta mira hopi mas desaroyo, un cantidad di combenionan presenta, algun ratifica y algun no pa gobierno di e diferente paisnan. Awendia nos ta enfrentando diferente tendencia y nos ta wak con diferente gobierno tin cu lidia cu destruccion di cuponan di trabao, of trabaonan cu ta keda automatiza nificando automaticamente perdida di cupo di trabao. Tambe mester mira e tema di envehecimiento di un poblacion cu ta importante den henter e desaroyo aki, ya cu esaki ta aumenta mas e dependencia di un sociedad. Ya hopi lihe desde su establecimiento na 1919 ILO a realiza trabaonan importante, e prome conferencia internacional di trabao na Washington ya caba na October 1919, na unda a adopta 6 combenio internacional di trabao, e cantidad di oranan den industria, desempleo, proteccion di maternidad, trabao di anochi pa hende muhe, edad minimo di esnan cu ta miembro di ILO. Y asina riba mandato di e paisnan miembro ILO, tambe un cantidad di reglanan minimo necesario pa rigi e mundo di trabao a keda estableci.
Ministro di Labor ta inicia cu Dialogo Tripartite
Mei mei di un situacion dificil, un cantidad di problema laboral creciente, SEPPA ta aplaudi e intencionnan di Minister di Labor pa trece cambionan den e diferente area of leynan cu ta perhudica e trahado. Netamente na occasion di 100 aña di ILO, nos ta mira e intencionnan cu hopi positivismo. Pa SEPPA e cambio di e dia di trabao di 8 ora pa 9 ora MESTER ta na discusion, igualmente e asunto di Uitzendbureaus cu ta cuadra igualmente den e lucha di paisnan miembro di ILO pa trece cambio den loke ta nan propio constatacion di e “creciente trabao precario” unda trabaonan ta sin derecho drechi di e trahador, tambe e problemanan di Inseguridad na pia di trabao, Enseñansa den su totalidad, Maneho di salario, tratadonan cu mester keda ratifica, Situacion social na Pais Aruba, ta e.o. temanan cu mester bin como prioridad.
E cambio di un dia di trabao di 8ora pa 9ora ta bai linea recta contra e lucha di 133 aña pasa, un kiebro den e lucha sagrado di un dia di trabao di 8ora! !!. Loke ta pasando na e momentonan aki cu trahador den trabao di 9 ora ta di tristeza total. Den algun ocasion ni ta respeta e derecho pa tin un ½ ora liber di pausa. E trahador ta den un situacion penoso, mas ausencia di cas, menos posibilidad pa carga e responsabilidad na cas cu famia, pero ta su situacion financiero ta obliga e trahador di keda den esaki ta haye obliga pa sigi traha den situacionnan precario. Anto nos kier papia di problemanan social sin mira kiko ta pasando akinan .? Trahadornan cu no mucho informacion, presiona y den mayoria di caso ta ser obliga pa firma un acuerdo muy apesar cu nan sa cu esaki ta desfaborece su persona y tin hasta contra reglanan. Pues pa trahadornan cu un entrada abao, e barrera di independencia personal pa financiero ta mustrando uno insuperable.
Na occasion di e momento special aki pa trahadornan di Aruba y rond mundo, SEPPA ta manda palabranan di Pabien pa cu e dia aki pa tur trahador na Aruba pa hiba un reflexion profundo riba e dia aki di 1 mei!!…. E dia aki no a bin sin un lucha, sin perdida di bida, sin cu a derrama sanger y mester haya su Balor. E aki no por wordo mira como dia liber, simplemente pa no ta trahando riba e dia aki.
Directiva SEPPA
Aruba, 26 april 2019
