1 mei 2018 trahadornan rond mundo ta recorda cu 132 aña di e lucha di e martirnan di Chicago, na unda lidernan sindical a ofrece nan bida pa conkista derecho di trabao di 8 ora, demostrando forza y grandeza. Mientras cu cada biaha ta keda recorda e lucha aki e ta mas cu obvio cu e dia aki cada dia mas ta wordo lubida.

Mundo henter ta recorda e dia aki, dunando muestra di gradicimiento na tur esnan cu a hiba e lucha aki. Nos ta recorda y reflexiona cu hopi alegria cada logro cu ta faborece derecho di trahadornan. Hopi trahador no sa o a lubida sucesonan di un dia manera 1 mei 1886, unda infiltrantenan den seno di trahadornan cu nan calumnianan y redashinan contra lidernan sindical a crea, prome un confusion y después desorden pa habri caminda pa e forsanan policial den un forma brutal y grotesco drenta den un reunion di trahadornan, pa kibra reunion, bati y/o maltrato pa despues mata lidernan sindical y trahadornan.

Esaki simplemente pa e lucha cu tabata ser hiba, esta e lidernan sindical y trahadornan solamente tabata kier un horario di trabao di 8 ora pa dia.

E provocacion a causa un confusion enorme y trahadornan tabata core tur caminda buscando forma pa scapa nan bida, pasobra polisnan tabata tira manera loco. Y e instigadornan cu un momento a hasi comosifuera nan tabata companjero di e lucha tabata para un banda ta wak e masacre tuma lugar. Ta hopi hende a wordo mata na e plaza Haymarket na Chicago.

Resultado ta e masacre di Chicago, cual a causa un ola di venganza contra e lidernan sindical, kendenan a organisa e reunion na e plaza Haymarket, pa un simple lucha di un dia di trabao di 8 ora. Infiltrantenan den seno di sindicato y trahadornan, instigadornan, instigacionnan di organisacionnan di dunadornan di trabao y prensa tabata e principal promotornan di venganza contra e lidernan sindical. Lidernan sindical a wordo acusa di a causa e masacre, mientras e berdadero culpabelnan tabata cana liber y haciendo mofa di lidernan sindical. Pues e lidernan sindical cu a Sali na defensa, cu a lucha pa e un dia di trabao di 8 ora a ser acusa di e masacre ¡! Esaki ta un hilaridad.

Den e ultimo añanan ta hopi cambio a bin ta tumando lugar na final di e dia e aspecto di placa ta gara mas interes. Asina nos ta haya e cantidad di excusanan ‘no tin placa, pesey no por duna’, ‘pa falta di fondo, mester trece cambio’, pero tambe e trahado cu ta enfrentando e bida cotidiano cu hopi inseguridad ta pone e aspecto placa na promer lugar den su negociacionnan. Algun ta prefera di culpa sindicatonan pa ‘no por logra suficiente’ desconociendo di forma total e pensamento di e trahador cu na final ta tuma e decision y e rumbo di negosacionnan.

E inseguridad, desconfianza cu tin pa con situacion lo ta den futuro ta basta preocupante bao di trahadornan.

Situacion na Aruba pa e clase trahador ta keda dificil. Ta un constante lucha pa logra apenas algun beneficionan aki aya pa e trahador. Ta parce cu ainda e situacion economico na nivel mundial ta manera un spirito rond di e clase trahador. E situacion aki ta uno basta hostil. Rond mundo nos ta mira con desempleo ta crece y aki na Aruba ta cuanto ta e trahadornan cu a perde trabao. Ta hopi trahador tin cu no tin trabao drechi y tampoco ta goza di beneficionan laboral drechi. Apenas un salario minimo nada mas !!

E lucha pa un Mihor Nivel di Enseñanza.

Un par di siman pasa, e mundo di docentenan, no docentenan, alumnonan, mayornan y hasta criticonan a dal un buelta pisa. Mientras cu e grupo aki di trahadornan y otronan ta enespera di e plannan efectivo pa trece mehoracion di nos enseñanza, diripiente mester a enfrenta e supuesto solucion ‘magico’, esta ta pensa di privatisa nos Skolnan Publico y hinca esaki bao di e un Stichting. Tur esnan preocupa no a para keto !! Despues di a scucha e diferente versionnan, di biaha e posicion a Sali, esta cu no ta di acuerdo pa privatisa nos skolnan publico.

Posicion cu a keda informa na tur esnan envolvi y tambe na e Parlamentarionan cu a demostra nan preocupacion pa cu e intencionnan.

Parlamentarionan tambe a ricibi e cantidad grandi di tur esnan cu a firma di ta Contra pasamento di DPS bao di un Stichting !!!!.

Mocion den Parlamento ta trece un poco trankilidad pero no e Paz laboral !!

Mientras cu tur hende a sigi e tratamento di Presupuesto, a sigi e disertacionnan na lugar y hasta esnan sin pia ni cabez, toch trahadornan den e mundo di enseñanza a sinti un poco trankilidad ora cu toch a mira un mayoria para tras di un mocion cu ta urgi e Minister di Enseñanza pa para tur proceso cu ta bai den direccion di hinca DPS bao di un Stichting. Hasta esun di EPI.

Pero esaki no ta cumpra ni bende e trahador !!!… Y hopi rapido nos por a scucha un reaccion na unda claramente e posicion ta cu lo pone un banda un rato, pero no cu lo para nada.

Ta pa e motibo aki tambe e trahador ta bisa cu pa un rato tin un trankilidad, pero no tin confianza y esaki mes ta hasi cu no tin Paz laboral.

Trahadornan Traimerdia ta den un Alerta !!
Recientemente trahadornan di Traimerdia a haya e informacion cu awor ta toca na nan porta !!. Awo e Minister di Enseñanza tin intencion di hinca e grupo di ambtenaarnan aki bao di un Stichting. Esaki mientras cu durante henter e asunto di DPS, pa convence e mesun grupo di trahadornan cu nan no mester ta preocupa, cu nan lo bai cay bek bao di Directie Onderwijs.

Ta manera SEPPA a premira y a adverti e mesun trahadornan, esta cu keda alerta paso den corto tempo nos a mira asina tanto biaha cambio di version cu no lo straña SEPPA otro cambio di version. Trahadornan ya a manda e mensahe pa Buro Traimerdia, cu nan como empleado publico no ta interesa pa bai cay bao di ningun Stichting y pa informa e Minister di esaki tambe.

E grito na Ministro di Labor pa para e DESASTER ey di un dia di trabao di 9 ora !!!
Ta un berdadero lastima pero e cambionan den nos leynan laboral ultimo (na 2013) a trece cambio den e e dia di trabao di 8 ora pa 9 ora. Hopi ta e trahadornan cu ta experenciando e cambio aki y ta sinti e dolor di ta traha un dia di trabao asina largo. Den algun occasion ni ta respeta e derecho pa tin un ½ ora liber di pausa.

E situacionnan aki ta sosode mas si nos mira cu den mayoria di e casonan aki tambe e trahadornan no ta organiza nan mes y afilia na un sindicato. Hopi biaha pasobra e salario minimo ey cu nan ta gana no ta permiti nan tampoco pa por paga pa e servicio di un sindicato.

Asina e trahador ta haye obliga pa sigi traha den situacionnan precario, den situacionnan cu enbez di hiba nan padilanti ta keda tene nan atras.

Principalmente e asunto aki ta un kiebro den e lucha sagrado di un dia di trabao di 8ora! !!

Trahadornan cu no mucho informacion, presiona y den mayoria di caso ta ser obliga pa firma un acuerdo muy apesar cu nan sa cu esaki ta desfaborece su persona y tin hasta contra reglanan.

Pues pa trahadornan cu un entrada abao, e barrera di independencia personal pa financiero ta mustrando uno insuperable.

Trahadonan bao Fundacionnan ta keda preocupa !!.
Den luna di December e Ministro di Labor actual a informa SEPPA cu gobierno su intencion no ta pa kita ni tampoco laga kita derechonan adkiri for di trahadornan cu ta cay bao di Fundacionnan. Esaki despues cu atrobe SEPPA a mustra e preocupacion cu gobierno anterior ta esun cu a trece e intrankilidad aki bao di e trahadornan .

Trahador kier seguridad den su bida completo, den nos sociedad, na cas pero tambe den su empleo. Esaki ta un necesidad humano basico. E proteccion di e hende contra adversidadnan di bida, accidentenan, enfermedadnan, desempleo, biehes y su consecuencianan amenazante pa e existencia humano tabata y lo ta preocupacionnan importante. Democracia ta rekeri cu e trahador ta parti di decisión, parti di e seramento di e compromiso colectivo.

Aunke e Ministro a duna un posicion cla riba e asunto aki, SEPPA sa cu ta varios fundacion ta buscando tur sorto di excusa pa trece cambio den e derechonan adkiri.

Aunke ta nan libertad pa busca conseho aki aya, e trahadornan ta manda e mesun mensahe aki cu a wordo duna anteriormente: Kiebro den cualkier derecho adkiri di trahador di fundacionnan: jamada pa conflicto !!

Na final SEPPA ta manda palabranan di Pabien pa cu e dia aki pa tur trahador na Aruba y hopi reflexion riba e dia.

Comments

comments