Awe, diabierna nan tabata tin un reunion programa entre sindicatonan y gobierno encuanto e indexering. Sindicato a sali for di e reunion aki, nan no a keda pa sigui atende.
Segun secretario general di e sindicato, Magali Brito, a splica cu e reunion a cuminsa laat y a caba di biaha.
A ricibi di parti di gobierno un proposicion. E proposicion por bisa cu ta keda mesun cos, solamente un biramento di palabra y e proposicion cu nan tabata tin for di dia 25 di october caba. A bin tende cu proposicion real mes ta un 0.515% den salario, cu ta nifica cu e trahado di gobierno apenas ta haya 5 florin y 76 cen.
Con ta mir’e asina pa motibo cu Gobierno ta propone pa e aumento di e tres primanan cu lo mester a tuma luga na januari, augustus y november, pa wanta esaki, cu ta nifica 315 florin.
E 315 florin ey nan ta dispuesto pa hink’e den salario, plus 75 florin.
Ora cu wak’e ta 390 florin, conta den 13 luna. Aki por mira cu ta apenas un 30 florin den salario na e momentonan aki.
Pero e realidad ta e 315 florin aki, e trahado di gobierno tin’e caba den su tres primanan y ta e 75 florin gobierno kier compensa pa e aumento di costo di bida di 2018. Ora cu mir’e den 13 luna bo ta sali e ora cu ta 5 florin y 76 cen. Nan kier mantene nan posicion di 0.6% y 0.4% cu nan a propone caba dia 25 di october. SEPPA a indica caba na gobierno cu e proposicion aki a wordo rechasa pa e miembronan di SEPPA. Esey ta nifica cu ta un lastima cu nan ta bolbe bek cun’e. Di banda di SEPPA a rechasa e proposicion aki completamente. Ta un lastima cu awor aki ta bin tambe padilanti cu pa e trahado di e fundacionnan, for di momento cu a introduci output subsidie na 2017, apesar di tur protesta di parti di SEPPA sigur, apesar cu for di momento cu e gobierno nobo a sinta, a ilustra e problema y a mustra ta perhudica trahadonan cu e hecho cu gobierno kier kita defacto e richtlijnen subsidiale regeling. Y awo a bin sali mas cla padilanti, pa tur trahado di fundacion, cu e derecho aki di indexering a wordo kita for di nan.
Ta compronde cu e lo conta solamente pa esnan cu ta traha como docente, cu ta cay bao di por ehempel SKOA, SMOA, SPCOA, etc. Ta un descriminacion aki pasobra gobierno na ningun momento mester a mete unilateral ni kibra e areglo aki cu ta existi for di añanan 90, cu e trahado di e fundacionnan.
SEPPA a rechasa e hecho aki cu a tuma luga cu trahado di e fundacionnan y ta spera cu e trahadonan mes por tuma nota kico a wordo haci cu nan.
GKMB y DTI a pone trabao abao
Tin hopi mal contento bao di e trahadonan di gobierno pa e hecho cu no kier reconoce nan derecho riba indexering door di duna un adaptacion husto. Ta un lastima cu hoofd van diensten ta bay over na intimidacion di trahadonan. Pero esaki tabata algo di spera. A discuti entre e sindicatonan, preparando e trahadonan pa tipo di actonan asina tuma luga, kico lo por haci y kico por ta e siguiente pasonan tambe, cu hasta por ta tuma contra tipo di actonan asina di parti di hoofd van diensten.
Consenso entre sindicatonan
Segun Brito, e sindicatonan ta reuniendo. Obviamente a reuni ultimo pa duna un ultimo oportunidad na gobierno pa bin cu un proposicion awe. Esey ta keda na cada sindicato pa evalua si e intento aki tabata bale la pena si of no. Di parti di SEPPA en todo caso, esaki no tabata bale la pena. Tabata tin un indicacion si cu awe, no lo duna e trahadonan di gobierno of sindicato, ningun paso p’adilanti pero ta pone mas cla cu tur e intentonan aki ta pa purba gana tempo. Nos tur sa cu gobierno ta den discusionnan hopi grandi cu Hulanda y e tema di aanwijzing, etc. Tur sa tambe cu esey pa otro siman tin hopi menasa pa esaki. E ora ta mira obviamente otro siman si bin un aanwijzing ta simplemente pa avisa e sindicatonan, cu a haci tur intento di buena fe, pero awor aki ta Hulanda ta impone pa no duna trahadonan di gobierno nada.
E weganan aki ta bon conoci pa SEPPA y a premira nan. Awor aki ta keda simplemente informacion cu ta bolbe manda nan hendenan y na final ta keda na nan pa tuma e decision si nan ta dispuesto pa lucha pa nan indexering. No por compara e maneho di un minimarket cu un supermarket grandi. SEPPA tin hopi trabao cu ta tuma hopi dia, pa prepara su hendenan y duna informacion kico realmente indexering ta nifica. Tin un fecha stipula pa un siguiente reunion cu su miembronan, pa asina mira unda nan ta para awor aki pa un decision final tuma luga.
