Minister Lampe ta sigui cu su plannan, mientras cu Minister President ta bisa cu e lo atende e preocupacionnan di docentenan di SPO cu tur seriedad… Pero kico docentenan mester interpreta anto cu tur cos ta sigui su normal??
Esaki ta pregunta cu Sindicato di Empleadonan Publico y Priva (SEPPA) ta haci den nomber di su miembronan. Magaly Brito, Secretario General di SEPPA, ta bisa cu dia 25 di juni 2019, Departamento di Scolnan Publico (DPS), a informa e docentenan di Scol Practico pa Ofishi cu ta cera e scol diabierna, 28 di juni 2019 pa tur alumno en conexion cu renobacion (“verbouwing”) cu lo tuma luga na ambos localidad.
Docentenan si lo mester bin scol di dialuna dia 1 di juli te cu diahuebs dia 4 di juli pa haci nan preparacion pa e siguiente aña escolar.“E forma di traha aki ta otro muestra cla cu no tin transparencia, ni respet y ta pa demostra e forsa di poder pasobra tur ordo ta bin di ariba y punto. Ainda e docentenan no a haya nan rooster mes. Pio ainda, nan no sa cu nan tin trabou e siguiente aña escolar, no sa unda lo bay duna les pues con nan por prepara sin sa na unda nan lo bay.”
Ni docente, ni alumno, ni mayornan merece un trato manera esaki y nos ta duda cu lo acepta e tipo di trato aki. Ta un falta di respet pa e docentenan y principalmente e alumnonan cu ta esun di mas importante den henter e asunto aki. Punto cu ta resalta y cu ta laga tur hende babuca ta:
•Unda derecho di mucha a keda mirando cu e mucha no por termina su aña escolar den tur trankilidad.
•E mucha mester ta central. Unda esaki a keda?
•Unda e derecho di un alumno a keda pa ricibi un actividad recreativo of deportivo pa clausura di su aña escolar?
•Hopi mucha ta pendiente pa dicho actividad pa nan por diberti pasobra esaki ta e unico momento cu nan ta haya pa haci esaki.
•Con por cera un scol sin cu e alumnonan di grupo 3 a ricibi nan certificado ainda (siendo e mayornan a paga caba pa e fiesta di graduacion)?
•Kico ta mas importante y ta mas urgente cu brinda enseñansa?
•Kico ta pisa mas hopi cu ta surpasa e derecho di enseñansa mirando cu tin e ley di enseñansa obligatorio? Of e ley ta permiti DPS of un Minister desvia, simplemente duna e ordo aki y cla?? Ki momento of den ki caso e ora ta permiti un Minister laga cera un scol??
•Kico ta e opinion of conseho di Directie Onderwijs mes riba esaki??
•Cua ta e argumento of rason cu ta duna na e mayornan cu e alumno su scol ta cera un siman prome?
•Ta tuma decision sin comunica cu docentenan, unda transparencia a keda?
•Te con leu un hefe di departamento por yega di dicidi di kita derecho di enseñansa di alumno?
•Ta un falta di respet pa alumno, docente y mayor pa un decision asina abrupto atrobe.
•Pa colmo e docentenan mes no ta altura cu tin renobacion (“verbouwing”) ta tumando lugar!
Cu e forma di traha aki di parti di DPS, di Minister e ta bon cla cu en bes di reconoce erornan, para keto, pone tur cos rond di SPO “on hold”, ta prefera di sigui consehonan robes, ta dal bay y sigui cu plannan cu na final di caminda lo perhudica e alumnonan. Pues awo, e responsabilidad ta den nan scochi pa e forma abrupto cu e scol a cera sin cu a duna e alumnonan e derecho di celebra nan graduacion manera cu nan merece. Nan mester carga e responsabilidad tambe pa e hecho cu tin alumno cu no a rondaf ainda manera cu ta e caso cu SPO Brasil y tambe cu alumnonan ta perde nan actividad di ceramento di aña escolar.
