E lucha di indexering no ta nobo. Segun secretario general di SEPPA, Magali Brito, den añanan 90 e discusionnan a reinicia. Prome cu esey caba tabata tin acuerdonan, pero na cierto momento, debi na situacionnan, a hala esaki un banda.
Si bay bek 11 aña pasa, por corda cu e tempo ey tabata tin e lucha grandi di 7 siman pa indexering, un ahustacion den salario debi na aumento di costo di bida.
P’esey empleadonan publico a para p’e e tempo ey pa keda cu e derecho. E inhaalmanouvre tambe a keda acorda. A conoce dos biaha 105 florin, un biaha 140 y un biaha 85 florin. A keda cu e derecho pero despues di esey tambe a mira cu na 2014 a acorda e tema di e reparatiepremie, con ta bay paga e debe ey na e empleadonan publico y a introduci un reparatiepremie. E aña aki a cuminsa cu aumento di tur tres premie, esta e bashipremie, reparatiepremie y tambe e gelijkbedrag. Aworaki, segun e acuerdo na 2014, ta mira tambe cu na 2020 tambe ta e ta suppose di bolbe subi. E indexering tin un historia hopi largo riba dje, Brito a splica. Locual cu kier ilustra aki ta loke a pone e sindicato di polis lanta para cu su miembronan ta pasobra cu desde april ta bezig cu gobierno. No tin proposicionnan, cada biaha ta keda warda. Ultimo a keda bisa e sindicatonan cu pa september, prome cu entrega e presupuesto na Parlamento mester tin un acuerdo, cual no a tuma luga.
No tin ningun proposicion, segun Brito. Loke tabata di spera a sosode, esta cu e miembronan a reacciona cu nan sindicato. Esey a conduci cu e diferente sindicatonan a cuminsa internamente reuni cu nan miembronan pa wak kico ta e plannan. SPA ta e prome cu a keda cla cu su miembronan. Awe SEPPA a bin pa sostene SPA pa e miembronan tambe mira cu tin reunionnan ta tumando luga den sindicatonan cu tin mas gruponan eyfo cu ta wardando.
Gruponan cu tambe ta mal contento cu e hecho cu nada no ta sosodiendo cu tambe na mesun momento ta wardando cu Gobierno lo por reacciona y bin cu proposicion na mesa. Nan ta kere cu ta momento pa papia cla, apesar cu sa cu como gobierno, nan tin diferente reto nan dilanti. Si no bin na mesa y papia di e tema aki cla cu un y tur riba kico por spera y con den e añanan binidero e empleadonan publico ta para y kico nan por spera di un eventual ahustacion, esaki ta e tipo di reaccionnan cu ta haya e ora di e miembronan.
Siguiente pasonan
Segun Brito, den e siguiente siman, e grupo di docente cu lo reuni cu nan pa nan decisionnan. Igualmente tin diferente departamento caba cu a cuminsa combersacionnan. SEPPA mes den curso di otro siman tin reunion cu su delegadonan pa asina ey e decisionnan mes ta tuma pa e diferente otro departamentonan cu ta den gobierno.
