Habrimento di scolnan ta un di factornan cu ta apunta na start nos economia y esaki nos tur ta mir’e. Compania of luganan di trabao ta habri porta bek, trahadonan ta bolbe bek na trabao y asina scolnan tambe lo habri. Tur hende ta desea apertura di nos scolnan, pero esaki mester sosode solamente ora ta sigur pa haci’e, asina Sindicato di Empleadonan Publico y Priva Aruba (SEPPA) a informa.
Pero ta importante cu e consideracion principal den e asunto aki di habrimento di scolnan, ta e siguridad y bienestar di nos muchanan, docentenan y e staf completo, nan famia y publico en general. Scolnan tin un rol importante den e sosten pa continua educacion di nos yiunan, yiunan di trahado, muchanan vulnerabel y e mantencion di servicionan publico escencial. Esaki mester sigui tambe como prioridad bao di e reapertura completo di nos economia.
Sinembargo, na e momentonan aki e ta bisto cu tin un falta di confiansa. Y e regreso insigur no solamente lo kibra e laso di confiansa entre scolnan y cas pero lo stroba e recuperacion exitoso a largo plaso di nos economia.
Ya prome cu e anuncio di un posibel apertura di scolnan ya esunnan den e sector di educacion a cuminsa sinti e intencionnan pa habri scolnan. Pero na mes momento a sinti tambe cu na nivel di gobierno no tin e comprension encuanto e peliger di e plamamento di coronavirus den cura di nos scolnan, pafo di scol, pa mayornan, famia y conocinan y bao nos comunidad.
Mas ainda ta parce cu e personal (docentenan, werksternan, asistentenan) lo no ta tampoco protegi pa medidanan di distanciamento social. Cantidad grandi di mucha den un klas combina cu nan edad jong ta nifica klas cu por bira un fuente di transmision di e coronavirus y plamamento di esaki. Pero e tema aki di cantidad di mucha den klas por varia pa scol y klas. E pregunta akinan tambe ta con ta bay splica mucha cu nan no mag di hunga hunto, nan no por ta cerca di otro pa papia cu otro ta parce cu nan mes tin cu midi e distancia.
Un rato ta bisa cu muchanan no ta pega otro pero den un rueda di prensa, bo por scucha 2 diferente ponencia. Un dokter di cas ta bisa un cos y un otro persona ta bisa diferente. Loke nos kier bisa akinan ta cu Distanciamento Social no ta bay den Scolnan basico.
Pero mientras cu te awo ta parce cu muchanan generalmente tin simtomanan ‘leve’ of no tin mes, loke no ta mucho cla of suficiente cla si esaki por wordo transmiti pa adultonan. Nos no ta kere cu gobierno mester expone e tipo di riesgonan aki na nos sociedad. Tanto mayornan como esunnan den cuido di nos muchanan mester tin e full confiansa cu scolnan ta sigur prome y despues di regreso di nos studiantenan. Ta pesey mes e discusionnan mester a inclui sindicatonan representando tur trahado di nos scolnan, manera docentenan, esunnan di limpiesa, esunnan cu ta traha como asistentnan, etc.
Habrimento di nos scolnan ta depende grandemente den sigura cu famia y esnan cu ta cuida tin full confiansa cu permitiendo nan yiunan na scolnan ta sigur. Nos no ta kere cu e confiansa tey na e momentonan aki. Mester traha riba esaki.
Lo tabata mas na su luga pa hopi tempran traha hunto riba e condicionnan pa un regreso sigur na scolnan basa riba e principionan cu mester ta ‘in place’, esta siguridad y bienestar di nos studiantenan y docentenan of staf como e base principal. E sentimiento di esunnan den enseñansa ta cu un caminda a sinta papia, a tuma decision pero ningun momento a envolvi esunnan cu por papia con e ta sosode den practica.
Ademas, cu den un asunto asina delicado tipo di desicionnan asina no por sosode di un dia pa otro y un dunado di trabao mester cumpli cu rekesitonan minimo di Siguridad, Bienestar y Higiena na pia di trabao. Loke e sector dieducacion no ta sinti cu tin na e momentonan aki.
Practicanan di tur dia y di operacion, proceduranan na scolnan mester cumpli cu e standardnan minimo y confiabel. Particularmente esnan cu ta regarda “distanciamento social”, higiena y practicanan di limpiesa, suplemento sigur di materialnan disponibel ora ta necesario, pero tambe guianan den caso di contacto fisico cu no por wordo evita cu muchanan y hunto cu esaki analisis regular di posibel risiconan.
No ta pornada cu docentenan mes ta puntra, unda e recursonan adicional ta pa e scolnan pa limpiesa profundo y constante di scolnan como medida esencial contra risico.
