SEPPA: Docentenan trahando oranan extra sin pago

Un grupo grandi di docente a reuni dialuna for di 4or di atardi te cu oranan laat di anochi pa trata e malcontento cu ta reina bao di docentenan y tur esnan cu ta traha den Enseñansa.

Tabata bisto e malcontento grandi cu tin, desacuerdo total pa e forma arogante cu e minister aki kier atende cu Enseñanza pero muy en particular futuro di nos muchanan. Loke cu a resalta den e reunion aki ta cu docentenan ta fada di e locuranan di e warwaru cu ta pasando riba nan y esey ta e mensahe cu a duna na Sindicato pa Empleadonan Publico y Priva Aruba (SEPPA) tambe: Enseñanza ta bou di atake”.

 

Reporteronan di 24ora.com tabata presente for di inicio di e reunion y na final a combersa cu Magaly Brito, Secretaria General di SEPPA, kende a splica cu un grupo grandi di su miembronan a aserca e sindicato pa un encuentro p’asina duna un splicacion riba e desaroyo riba diferente asunto den Enseñansa. Por mira claramente un grupo cu ta hopi preocupa pa loke ta sosodiendo den diferente otro scol. Coleganan ta mira con otro coleganan, aunke na otro scolnan, no ta haya participacion debido den diferente asunto cu ta tocanan. Esaki ta lantando hopi mal contento bao di esnan cu ta traha den enseñansa.

Durante e reunion a splica e miembronan kico ta sosodiendo y kico por spera. Pero no ta kita afo cu e docentenan aki tambe ta evalua pa nan mes, con ta obliga nan entre otro pa cumpli cu un cantidad halto di oranan di trabao, pa cual, segun e docentenan, nan no ta ricibi pago p’e.E ora esakinan tur a lanta como preocupacion y esaki SEPPA ta recogiendo pa manda tur e puntonan aki na e minister encarga cu Enseñansa, pero tambe na e diferente fundacionnan cu ta cay bao di Enseñansa.

Intencion

Brito a splica tambe, SEPPA y Simar semper a traha hunto. Awor aki nan ta ricibiendo preocupacion for di nan miembronan. Pero SEPPA mes a cuminsa cu nan buelta di su miembronan pa por reuni. Loke SEPPA lo haci ta comparti e informacionnan difundi, cu Simar, p’asina nan sa tambe kico por a recoge for di e miembronan di SEPPA p’asina nan ta na altura tambe.

Siguiente reunion

E grupo di SEPPA a dicidi caba cu e siguiente reunion cu nan kier tene ta dialuna awo, pa asina comparti tur otro informacion cu nan demas coleganan. For di eynan wak ki decision por cay entre nan. Aworaki SEPPA ta lagando na e trahadonan pa tuma un decision di ki paso nan kier tuma pa mustra e mal contento cu nan tin, pa tur loke ta pasando na nivel di Enseñansa.