SEPPA: Bida di trahadonan di Warda nos Costa ta na peliger

E situacion na Warda nos Costa sigur ta di preocupacion pa e trahadonan, kendenan ta sinti cu nan ta den un abismo, cu escases di personal y tambe e capacidad di detenidonan cu ta haci cu nan ta traha bou di stress. Pa e motibo aki mes, Edmundo Marlin di SEPPA a presenta na e edificio y a splica cu siman y mey pasa, tabatin reunion cu minister riba e situacion, pero keto bay nada di solucion di parti di Minister Andin Bikker.

Ultimamente por a mira cu tin un situacion andando na Warda nos Costa y constantemente cu nan mester haya refuerso di polis pa e situacion cu nan ta aden. Ta compronde esaki mirando cu e frontera ta cera y e hendenan no por bay bek. Pero dado momento, ora cu mira e situacion cu e trahadonan ta aden awor aki, nan dimension di trabao a cambia radicalmente.

SEPPA ta comenta riba situacion di Guarda Nos Costa

Posted by 24ora on Saturday, August 1, 2020

E momento cu esnan cu ta cera na KIA a sinta nan castigo, nan ta suppose di yega na Warda nos Costa pa asina di turno GNC deporta nan, conforme ley. Pero na momento cu tin un situacion manera e frontera ta cera y no por saca nan afo, e hendenan aki, cu ta cera pa varios luna y esnan cu ta bay bin awor aki cu tin cierto hendenan cu ta basta peligroso, ta trece e trabao di e trahadonan na peliger.

Tin esnan cu ta cera pa basta luna, cu no por sali pa motibo cu e frontera ta cera, pero banda di esey tin e otro grupo cu ta drentando, cu no por keda KIA, pasobra na momento cu nan sentencia caba, nan no por keda cera den KIA mas sino e ta bira vrijheidberoving pa ley. Automaticamente nan tin cu bay na GNC. Eynan a mustra minister cu e situacion aki mester di un urgencia. No ta awo esaki ta sosodiendo.

Loke cu a pone e cherry riba e bolo ta e construccion cu ta tumando luga na Huis van Bewaring na Dakota, caminda cu tin yen di material ta plama rond. E trahadonan tin cu traha memey di esaki. Loke a pasa ultimo ta indica cu e trahadonan no ta trahando den un ambiente sigur, pasobra en particular anochi, e ta bira hopi mas peligroso.

Ta evita pa hendenan bay, pero ta haya hendenan ta drenta na HvB y e ta hopi mas peligroso. Den e reunion cu minister, SEPPA a vocifera cu dado momento ta bay over pa ekipa e trahadonan aki. Nan mester haya e entrenamentonan necesario pa combati disturbio y tambe, locual mester sosode awo, cu e compleho cu nan ta trahando aden, mester ta sigur pa e trahadonan y tambe e ilegalnan cu ta cera. Te na e momento aki e no ta asina.

Tanto FOL como HvB tin su mankement, pero awo cu e construccion ta haci e situacion mas peligroso y e trahadonan no por mas.

A bisa minister pa bin bishita e dos edificionan aki pa wak e situacion cu e trahadonan ta bibando aden, cu nan bida ta na peliger. Locual cu por enfatisa ta cu e trahadonan ta dicidido cu nan no por sigui mas asina aki. Ningun hende ta sali for di nan cas pa bin traha fielmente, pa bay haya nan mes den un situacion asina aki.

Pesey SEPPA ta pidi urgentemente na minister pa atende e asunto aki hopi na serio. Esaki ta djis e comienso. E trahadonan a wanta hopi. Nan ta fiel na nan trabao, pero cierto momento e hemchi ta bay over. Esaki ta locual ta pasando awor aki, pasobra e trahado ta sintiendo cu nan bida pa eherce nan trabao ta hopi na peliger y ta cosnan cu no por acepta mas.

Dado momento e minister mester tuma esaki na serio. A papia diferente biaha cu e minister, pero no sa si e minister ta tumando locual cu SEPPA a trece cerca dje den consideracion.