SEPPA a bar’y mop den referendum na SABA

748

Directiva di sindicato SEPPA ta hopi contento cu nan a gana e referendum na SABA. Un referendum cu a duna nan e batuta bek pa representa trahadonan di e fundacion aki.

E referendum aki a tuma luga bou guia di Mediador di Gobierno, Anselmo Pontilius kende a splica cu debi na e cantidad di trahadonan a parti e votacion den tres area. Den oranan di mainta esnan trahando na SABA na San Nicolas a haya chens di voto entre 8.30 pa 9.30 di mainta; na Savaneta e trahadonan por a vota di 10’or te 11.30 y na Playa por a vota for di 1’or pa 3’or di atardi.

Un total di 272 persona tabatin derecho di voto y 224 a haci uzo di e derecho aki. E resultado a demostra cu sindicato SEPPA a haya mayoria di e votonan. Nan a logra bay cu 141 voto mientras cu ABV a haya 71 voto y e resto di e votonan tabata invalido.

Mediado di Gobierno ta reacciona riba referendum na SABA

Mediado di Gobierno ta reacciona riba referendum na SABAClick e link pa mas: http://24ora.news/3ikyLy6

Posted by 24ora on Friday, January 15, 2021

Inmediatamente despues di e referendum a papia cu gerencia di SABA, pasobra ta consciente cu tin e problema di Bashi Premie ta algo cu tin e trahadonan di SABA preocupa.  A informa Mediador cu nan lo haci pago di e Bashi Premie ora cu e trahadonan emiti nan opinion riba e forma con ta bay corta den gastonan.

El a recorda cu e fundacionnan cu ta haya subsidio, ta pasa den momentonan dificil pasobra a corta den e suma di placa cu ta haya tur aña cu 12.6%. SABA cu casi 300 trahado, tin gasto operacional ta halto y ta algo cu mester bay atende cu hopi urgencia. Mester atende cu e temanan den forma profundo, pasobra no ta problemanan cu ta disparce sin mas. Y e fundacionnan aki ta bay keda existi pa cuida hendenan special y hendenan grandi.  Niun e fundacionnan aki ta genera placa di nan mes.

A conseha pa despues di referendum drenta den un programa profundo di conscientisacion riba loke ta gastonan.

Na SABA tin un contracto colectivo vigente ainda.