Diamars mainta pa 8:00 un señora a yega cas na Pos Chiquito y a ripara cu e porta patras tabata habri. El a spanta y no tabata sa si ainda por tin hende den su cas, y di biaha el a core yama polis.
Na yegada polis por a mira cu a forsa e porta pa por a habri esaki. Polis a cana den e cas pa mira si tabata tin hende paden, mientras cu un otro agente policial a keda pafo pa vigila. Despues cu a confirma di no tabata tin hende den e cas, e señora por a bay paden. Polis a tuma su declaracion di e sucedido y a bis’e cu lo haci mas investigacion pa por yega na e sospechoso.
E señora a bisa cu algun dia pasa un hende a horta su slang, pero despues el a bin topa cu su bisiña cu esaki. No ta prome biaha cu hende ta drenta den cura y horta cosnan for di dje. Na e momento ey e señora no por a bisa si e falta algo tanto paden como pafo di cas.
