Diabierna net prome cu merdia a drenta informacion cu tin un problema na salida pa Merca. Un pasahero femenino y local a anuncia alarma di bom. E ta naci na 1937. E tin 81 aña y tabata biahando cu tres yiu pa Miami riba e vuelo di Surinam Airways.
Pa motibo di su expresion kisas intencional of no intencional, a causa cu el a keda tera. A detene e señora di 81 aña. A hib’e warda mesora. E yiunan no a biaha tampoco. Un biaha mas a activa e team completo cu a reuni na aeropuerto. E biaha aki e cos a bay diferente cu otro biahanan. No tabata necesario paralisa e vuelo. E motibo ta cu ainda e momento ey e maleta di e señora no a bay abordo di e avion. Tabata den e proceso na e parti di autoridad Mericano cu el a haci e actuacion y expresion cu a paralisa tur cos e momento ey.
Despues di reuni na airport y tambe despues di interogacion, autoridad a laga e señora den libertad. Parce autoridad a constata cu e no ta 100% di salud y p’esey mes el a haci cierto expresion cu e mes no por para p’e. Loke el a causa por tin consecuencia pa futuro vuelonan. Sea na imigracion Mericano mes of cerca e aerolinea e chens ta grandi cu e no tin acceso. E palabra bom ta manera un palabra malo ora cu ta trata di aviacion. Nan ekipahe a ser controla y saca for di aeropuerto.
