Dos persona cu recientemente a keda deporta di Aruba, a duna declaracion basta pisa di e trato cu nan a ricibi na Aruba, specificamente na e instalacionnan di Guarda Nos Costa y e persona cu ta maneha e departamento aki.
Declaracion di e señora aki ta confirma alabes tur loke cu otro detenidonan y personal di Guarda Nos Costa a bin ta saca afo ultimo tempo. Un abuso di poder cu ta scucha tur rond pero cu te ainda e Minister encarga cu GNC, Andin Bikker, no a haci nada.
Un di e personanan aki ta un señora, esta Maria. El a cuminsa su declaracion pa bisa “mescos cu tin hendenan bon trahando na Guarda Nos Costa (GNC), tambe tin hendenan malo trahando eynan.” Y a agrega cu “Si tin un persona cu ta hopi malo, ta trata hende malo y ta viola derechonan humano ta e señora cu yama Trudy Hassell.”
https://www.facebook.com/24ora/videos/1340641109421627/
Su keho ta basa riba e hecho cu nan a pasa aden. Asina, el a bisa, tin hendenan cu tin nan permiso pendiente na DIMAS y ta cera na Guarda Nos Costa. Na momento cu nan permiso keda cla, ta laga e personanan aki liber, pero ta yama DIMAS pa hala e permiso aden, pa despues recoge nan pa deporta nan. Cu boca grandi, Hassell ta bisa e hendenan, cu ningun hende cu ta cera na Guarda Nos Costa merece di tin un permiso. “Personanan cu 32 aña na Aruba, cu ta papia Hulandes y Papiamento, e tin nan cera pasobra, e ta bisa, nan mester wordo deporta. Hasta tin personanan di 14 y 16 aña cera na GNC pa deporta nan.”
Na momento cu sra. Maria tabata deteni na instalacionnan di GNC, el a sinti cu sra. Hassell tabata maneha e luga manera un cuartel militar. E hendenan por a sali pafo coy aire maximalmente mey ora pa dia. Y e lunch mayoria biaha tabata laat, rond di 1’or pa 1.30 y despues di esey ta direct pa e celnan. Mesun cos ta sosode ora di cena, e cuminda di atardi laat nan ta hay’e pa 6’or. Despues di e cuminda apenas mei ora nan tin pa respira aire y relaha prome cu hinca nan bek den celnan.
Asina tin hendenan cu ta sperando contesta di asilo politico, cera na instalacionnan di GNC. “Sra. Hassell bo ta un abusado, e tin simplemente un rabia contra Latinonan y eyden tin un trato inhumano. E muhe ey no tin curason.” Esnan cu ta firma pa pidi asilo politico, e ta cera nan bek, pasobra e ta bisa cu e peticionnan ta wordo nenga toch.
Personanan cu tin peticion tambe e ta bisa nan cu e peticionnan a wordo nenga, sin sa si esaki a sosode, y ta pone presion pa nan cumpra pasashi y bandona na Aruba. “E no kier pa ningun Latino ta na Aruba.” Durante cu Maria tabata cera na GNC, a topa personanan cu tabatin 3 of 4 luna cera eyden, pasobra tur hende mester cumpra nan mesun pasashi. Esnan cu no tin placa, mester keda cera eyden te ora cu nan haya placa pa cumpra e ticket pa nan pais. Tin personanan cu tin 10 aña na Aruba, bayendo scol pero e tin nan cera pasobra nan peticion ta aden y nan falta cierto documentonan pa trata e permiso.
Sinembargo e denunciante ta bisa na mesun momento cu no ta tur hende na GNC ta malo y nan sa cu tin hopi cu no ta contento cu e forma con Hassell ta atende cu e personanan cera na GNC. “Pero niun ta tribi di papia. Hasta cu esnan cera e ta blof cu personanan cu tin permiso e por percura pa nan wordo saca di e isla. El a conta e caso di un homber cu tabata cera ora cu su permiso tabata na punto di vence. Na momento cu el a laga e homber bay, esaki a bisa Hassell “bo ta un abusador”. E renobacion di e cabayero aki despues di dos luna a keda nenga y e propio Hassell a yam’e y bis’e “awo bo sa kico ta un abusado”. Nan a yama Trudy Hassell pa un bruha.
Nan ta pidi husticia, pa investiga kico ta pasando den e cuartel militar di GNC y papia cu e personal pasobra tin hopi hende eyden malcontento.
E denunciante a bisa cu e tabata un bishitante regulardi Aruba y un bon record. E ultimo biaha’ki el a haya 4 dia y na momento cu e tabata bay pidi extension, e di shete dia, nan a detene.
