Seminario di karate cu ‘Sensei’ Yanis Venizelos

Cu hopi placer Aruba Karate Bond ta invita tur karateka miembro di Aruba Karate Bond pa participa na e seminario di ‘kata’ y ‘kumite’ di ‘sensei’ Yanis Venizelos di España. E seminario aki ta tuma luga diadomingo 8 di december na Maria College MAVO gymzaal for di 10or di mainta pa 1 or di atardi.

Participacion ta gratis. ‘Sensei’ Yanis Venizelos ta un 5to Dan JKA/WKF/RFEK. E ta arbitro mundial cu hopi aña di experiencia y ta entrenador di e conocida karateka y medayista mundial Andrea Armada di Venezuela. Actualmente e instructor mundialmente reconoci aki ta na Aruba pa un campamento y preparacion special pa e seleccion di Aruba Karate Bond, kende ta consisti di Janilaine Bello, Alejandro Gonzalez Lujan, Juan David Velasquez y e coach local Alberto Gonzalez Lujan.

Hunto nan ta train duro pa e calendario 2020. Aruba Karate Bond ta desea nan hopi exito. Na mes momento Aruba Karate Bond, bou presidencia di ‘sensei’ Felix Tromp, ta spera di wak tur karateka miembro di Aruba Karate Bond na e seminario riba diadomingo 8 di december. No perd’e! Un palabra di danki na Stichting Sportsubsidie Aruba, Aruba Sport Unie, Comite Olimpico Aruba y señor Aldrich Maduro (Al Training Performance) pa continuamente ta sostene karate di Aruba.