Selma Arends, un di e acusadonan den e caso IBIS cu su tratamento a cuminsa dia 14 di januari ultimo, a presenta su mes como un persona cu semper a haci loke el a kere ta bon. “Nan a pidimi busca donacion y mi ta haci esey,” el a bisa. Den e dianan aki e acusadonan tin chens pa, hunto cu nan abogado, defende nan mes contra e acusacionnan presenta dor di Fiscal di Ministerio Publico.

Su Abogado mr. Lejuez a bisa Hues awe cu e declaracion di Irene van der Linde di Laboratorio Familiar uza contra su persona mester wordo poni den su contexto completo. El a lesa un pida di e declaracion unda cu van der Linde ta bisa cu ni Selma ni Paul Croes, Minister di Labor, a pidie placa of donacion pa haya e ontheffing cu e tabatin mester.

E donacion di Irene van der Linde no tin nada straño na dje, pasobra e tabata riba lista di e personanan cu Selma Arends a traha pa motibo cu e aña anterior el a cumpra carchi caba (y no a haya ontheffing e tempo ey). Ta pa puro casualidad, den e combersacion graba, van der Linde a yama e dia ey y Selma a bis’e cu hustamente e tabata di bay yam’e pa mira si e kier cumpra un mesa.

E grabacion cu e Chines si lesa bon, e Chines ta ofrece pa paga 3 mil florin, pero Selma mes no a contest’e riba esey. Ademas, e placa aki nunca el a ricibi. “Mi cliente no tin ningun influencia of algo di bisa riba e peticionnan cu ta wordo haci. Ta simplemente ricibi e documentonan y mandanan pa e personanan concerni. Pues no por papia di passieve omkoping manera Fiscal ta bisa,’ asina abogado Lejuez a trece dilanti.

Den su ultimo palabra Selma Arends a manera laga un bom cay pa OM y Hues. El a splica cu e tin 26 aña trahando como ambtenaar y 24 aña ta colabora den politica. “Tur partido Señor Hues, cualkier cu ta na mando of pafo ta haci mescos. Tur ta pidi donacion y bende rifa. P’esey ora cu nan a pidimi busca donacion, mi a hacie. Mi no a mira nada straño den esey. Mi a wak kendenan a yega di yuda den pasado caba, y mi a puntra nan. Mi no tabata sa cu esey ta malo mirando cu tur partido ta hacie.”

Diabierna dia 1 di februari ta cera tratamento di e caso IBIS y tres siman despues, esta riba 22 di februari, lo dicta sentencia. E fecha inicial tabata 19 di februari pero na caminda a haya problema cu logistica y a cay un poco atras.

Comments

comments