Den e sistema di belasting tin berdad un distincion riba hendenan cu ta gana bao di e nivel minimo cu bo ta yega na remarca pa paga belasting, cu ta mas of menos 1400 pa 1500 florin pa luna. Wesley Kook director di Selikor a splica un tiki con ta atende cu e grupo aki.
Si bo ta gana bao di esey, hopi biaha ta hendenan cu tin un uitkering of un pensioen so, AOV, of si bo sueldo ta asina bao cu no tin otro entrada, bo por bin na remarca door di pidi pa haya exoneracion di e belasting. Dimes ta haci e chekeo prome cu haya esey, pero e posibilidad tey si.
Pero na prome instante, tur hende tin e obligacion di paga e belasting.
Mantencion
Segun Wesley Kook, e trucknan ta specialisa pa recoge sushi. A haci hopi sondeo den pasado pa wak cua ta e trucknan cu mas a wordo recomenda of cu mas miho ta bay cu nos clima, e sistema di cayanan, manera di recoge sushi. Den pasado, tabata usa trucknan di marca Mericano, pero ya tin hopi aña caba cu ta usa marcanan Europeo, debi cu e sistema di colecta tambe ta Europeo.
Tin marca manera clico, cu ta un container cu standardnan di Europa, di bon calidad. E ora e trucknan mester por sirbi e cliconan ey. Pesey a opta pa e truck di sushi ta di marca Daf. E parti ariba ta varia. Den pasado a usa gesing. Awo tin un marca Italiano, Iveco. Pero en todo caso, e trucknan ta duna bon resultado. Un truck asina ey, cu su mantencion, mester ta regular. Un truck asina ey ta bay minimalmente ocho of tin biaha hasta dies aña, depende con el a wordo usa.
Tambe pa e temporada ey, cu e yega 8 aña, ta cuminsa wak su condicion. Si e ta den bon condicion ta rek’e algun aña mas.
Promedio e trucknan ta bay banda di 10 aña.
Flota
Ta wak e bouwjaar di e truck. No ta tur truck ta wordo cumpra pareu. Cada ocho aña ta haci un revision riba e truck. Y depende di e cantidad di truck cu a cumpra cu a pasa ocho aña, e ora ta tuma un decision si ta reemplase si of no. Mayoria biaha ta cumpranan den batch di tres of cuater truck.
Esey ta pone cu tur aña di nobo, tin truck ta bin na remarca pa wordo cambia. Hopi biaha ta conta un promedio di tres pa cuater truck. Tin biaha dos pa tres truck. Por bisa cu practicamente tur aña ta cambia tres truck di e flota.
E truck Daf ta di Hulanda. E ta mas bien e chasis y motor. E baki mes y e sistema cu ta sirbi e cliconan, ta usa Coseco, cu ta e marca Italiano.
