Relashoná ku dia promé di mei, ku ta dia di labor, direktor di Selikor sr. Wesley Kook den presensia di grupo di servisio di sindikato den Selikor BTG i ABVO a gradisí e personal di Selikor pa nan labor sigur durante e krísis di Covid-19. Komo apresio a regalá nan tur un pakete di desayuno.
Gerensia di Selikor ta aploudí e forma ku, apesar ku nos ta pasando den un temporada difísil di covid-19 ku a afektá tur hende, e personal di Selikor a sigui presta labor i sirbi komunidat. Selikor, komo kompania vital ku ta hiba e maneho di limpiesa, mesora a sa di ahustá na e situashon aktual pa mantené servisio di un forma responsabel i optimal.
Sigur e personal operashonal di Selikor tin un ròl importante den nos maneho diario i tur dia di nobo ta laborá pa duna e mesun bon servisio apesar di e temporada difísil ku komo mundu henter nos ta eksperensiando. Mainta trempan promé ku e trùknan a sali, ku bendishon di Pastor Raul, trahadónan a pasa den forma di drive thru tuma nan pakete di desayuno i sigui mesora despues ku nan ruta di dia. Selikor ta balorá e aporte di kada trahadó i ta gradisí komunidat tambe ku a sa di karga ku nos durante e periodo di Covid-19.
