Durante un enkuentro informal Selikor NV a duna rekonosementu na grupo di karnaval Hats off to Dreams (HOTD) i tambe Curaçao Zoo pa un obra di arte ku konhuntamente nan a presentá durante marcha grandi di karnaval 2019. Ku e obra di arte akí ámbos organisashon a demostrá ku ta ku esfuerso kolektivo nos por protehá nos medioambiente.
Ounke Karnaval 2019 ta tras di lomba, tin ainda pasashinan di selebrashon di e fiesta kultural akí ku Selikor mester para ketu na dje. Ta trata spesífikamente di e roadpiece di e grupo HOTD, ku alabes a resultá grupo di aña 2019.
HOTD a presentá un Rhino trahá di mas o ménos 300 tayer bieu. Públiko karnavalista durante e marchanan di karnaval di hende grandi por a disfrutá di un obra di arte den kua e aspekto di reusá a bini bon kla dilanti. HOTD ta duna krédito na Curaçao Zoo pa e kreashon úniko di e Rhino ya komo ta Curaçao Zoo a traha e roadpiece.
Tantu HOTD komo Curaçao Zoo tabatin un meta spesífiko ku e kreashon di e Rhino. HOTD su meta tabata pa konsientisá miembronan di e grupo di karnaval i komunidat den su totalidat riba posibilidatnan ku ta eksistí ora bo ke krea algu nobo. Den un proseso pa krea algu nobo ta importante pa konsiderá hasi mas uso di materialnan eksistente en bes di usa material nobo. Curaçao Zoo di nan banda kier a laga komunidat sera konosí mas djaserka ku e aspekto akí tambe di e organisashon. Den kreashon di e obra akí Curaçao Zoo a hasi uzo di nan propio fasilidatnan i personal.
Grupo di karnaval HOTD mas aleu a splika ku ta for di preparashonnan na nan sede, kual tabata na Curaçao Zoo, nan a motivá miembro i boluntarionan pa resiklá bleki i plèstik. Esaki no tabata otro durante di marcha di karnaval ya komo kada miembro tabatin un beker di plèstik i por a reusá esaki durante di tur 2 marcha. Ku esaki e grupo a logra prevení mas o ménos 8000 kùp na shushi kual tambe ta un pilar importante ora ta papia di kuido di nos medioambiente.
Selikor NV ku tin na su enkargo maneho di limpiesa riba nos isla ta aploudí e tipo di inisiativanan. Tantu HOTD i Curaçao Zoo a demostrá ku nan tin kuido di nos medioambiente na pechu i mas importante ta ku nan a pone esaki den práktika di un forma kreativo kreando un arte di material ku lo a resultá riba lèntfel. Komo insentiva, pa nan sigui ku e bon trabou Selikor NV a otorgá na kada organisashon un donashon komo un sosten. Curaçao Zoo a risibí un cheque na balor di 1500,00 florin i HOTD a risibí 750,00 florin.
Selikor ta yama danki na e 2 organisashonnan akí pa a inspirá nos komunidat ku nan idea i kreashon. Alabes Selikor ke stimulá kualke otro organisashon i alabes gruponan di karnaval pa karga e mesun filosofia pa redusí shushi durante henter aña i sigur durante e periodo di preparashon pa ku karnaval, kual ta un periodo ku den korto tempu ta produsí hopi shushi.
Alabes Selikor NV ta informá ku próksimamente, den kuadro di selebrashon di 25 aña komo un kompania anónimo di gobièrnu na dezèmber di 2020, lo bai tin un proyekto speshalmente pa gruponan di karnaval netamente den kuadro di kuido di nos medioambiente. Keda pendiente pa mas detaye riba e proyekto akí pa karnaval 2020.
