Selene Kock: E vacuna ta sigur y cu masha poco efectonan secundario

Ayera tardi e prome cargamento di vacunanan marca Pfizer a yega cu vuelo di KLM for di Hulanda y mescos cu ta sosodiendo rond mundo, ta ricibi esaki cu yen di speransa marcando asina un comienso nobo den cuadro di recuperacion di e virus aki.

Dokter Selene Kock, specialista di pulmon, a sigura cu e vacuna ta importante den cuadro di recuperacion di mas contagio riba nos isla. P’e tabata un dia emocionante pa mira e vacunanan yega Aruba. Cu esaki por mira e luz na final di e tunnel. E meta ta cu pa prome cu fin di juni, un total di 85% di Aruba ta vacuna, segun e specialista.

Ta un trayecto basta intensivo pa e proximo lunanan. El a comenta cu por a mira un centenares di pashent cu a yega hospital malo cu COVID-19, di cual varios di nan a drenta den unidad di cuido intensivo. Un di e complicacionnan cu e virus ta trece cu ne, ta e problemanan respiratorio, di cual mundialmente un averahe di 80% di e pashentnan cu drenta ICU, ta fayece. Na Aruba, averahe di morto den ICU ta di 20%, cu ta menos di e averahe mundial!

Tin di e pashentnan ta keda atras cu retonan pa algun tempo mas, despues di recupera y test negativo pa e virus. Retonan manera dolor di cabes, problema pa hala rosea normal, limita pa haci movecionnan y asina por sigui menciona. Esunnan cu drumi mucho largo den ICU ta haya nan mester atende revalidatie pa por lo menos dos bes pa siman, pa siña cana di nobo, siña move di nobo y asina por sigui menciona.

Drs. Selene Kock, di 42 aña di edad, ta procedente di Savaneta, a studia pa psicologo na aña 1997, pero a dicidi di cambia di estudio pa bira dokter. Na 2004 el a gradua como “basisarts” pero a opta pa sigui studia mesora y pa specialisa den “cardiothoracale chirurgie” na Maastricht, Hulanda. Desde dia 1 di januari 2011 el a bira un specialista di pulmon, pues tin 10 aña di experiencia awo.  

Pa loke ta e vacuna mes, e dokter a sigura cu e ta di bon calidad y ta duna bon resultado. Claro cu tur vacuna, mescos cu tur remedi, tin efectonan secundario, pero nan ta limita. Efectonan ta manera dolor di cabes, un pleki blauw unda haya e hangua, mareamento y hasta poco keintura. Asina cu haya efectonan alergico mester avisa bo dokter di cas pa tratamento adicional.

Un peticion di dokter Selene Kock ta pa pueblo di Aruba registra. Tur esnan cu tin mas cu 18 aña di edad mester registra pa asina tuma e vacuna aki. Tambe un peticion ta bay pa yuda e pashentnan di edad mas avansa, cu por ta no tin un smartphone, yuda nan download e Aruba Health App y registra e ser keri cu ta riba 60 aña. 

Noticia relacionaMas for di e autor