E seleccion Nacional di futbol di Aruba a biaha pa Guadalupe, pa enfrenta Guadalupe den e di dos wega di CONCACAF Nations League. Mainta trempan e hungadonan di e seleccion a yega Aeropuerto pa por a biaha pa Guadalupe, unda cu nan a topa cu Presidente di Arubaanse Voetbal Bond (AVB), ing. Richard Dijkhoff. E Seleccion Nacional a gana nan prome wega y diamars awo nan lo hunga nan di dos wega den fase di grupo, buscando otro 3 punto den nan poule.
E Seleccion Nacional ta bon prepara p’e wega contra di Guadalupe, cual team ta mas halto cu nos riba e ranking di FIFA. Marvic Bermudez, assistent coach di Seleccion Nacional, a expresa cu Guadalupe ta afilia na Francia y ta reforsa nan mes cu hungadonan di Francia. E coach di Guadalupe ta un ex campeon mundial di 1998 y ta un honor pa hunga contra di un team cu tin coach di e nivel ey.
Na comienso e trainingnan a bay un tiki fastioso pa motibo cu no tabatin veld. FFD ta encarga cu e veldnan y otro hende tabatin e veld reserva, pero despues cu porfin por a haya e veld, trainingnan a inicia. E trainingnan a ‘pick up’, ora e hungadonan di Hulanda a yega Aruba y e otronan a haya liber di trabou. Nan a keda hunto un biaha mas na hotel y asina e training a bira mas intensivo.
Seleccion Nacional tin 4 compromiso standard di CONCACAF Nations League y awo ta bay hunga e di dos wega. Marvic Bermudez a sigui splica cu si gana 3 punto mas, despues ta bay den un ranking unda cu tin tur 35 pais di CONCACAF y na final 12 ta clasifica. Aworaki Aruba tin 3 punto y si gana Guadalupe lo yega 6 punto y ainda lo resta dos wega. Na November Seleccion Nacional lo enfrenta Monserat y na Maart 2019 lo hunga contra di St. Lucia.
E Seleccion Nacional di Aruba lo enfrenta Guadalupe diamars dia 16 di October y AVB ta invita tur hende pa sigui e desaroyo di e wega via e pagina di Facebook di Arubaanse Voetbal Bond – AVB.
