E seleccion nacional di bowling masculino tin un compromiso e fin di siman venidero na Las Vegas, Nevada unda nan lo participa na e torneo mundial di World Bowling unda e mihonan di mundo lo topa otro eynan.
E evento mundial aki lo tuma lugar e dianan 24 di November te cu 5 di December. Mester bisa cu pa varios luna nos bolicheronan masculino a entrena den forma intensivo, nan hiba un preparacion debido pa cu e torneo mundial aki y ta cla pa saca cara di nos bandera manera semper nos ta custuma di e deporte di bowling. E seleccion nacional masculino ta consisti di e bolicheronan Jason Odor, Yannick Roos, Elias Halabi, Renald Thiel y Oswald Dijkhoff mientras nan lo wordo guia door di coachnan Chris Dammers y James Porter, coach international. Nos bolicheronan a conoce un bon aña 2017 unda nan a competi den e Panamericano Hubenil di bowling na Monterey, Mexico y a duna bon bataya. Mas cu claro no por keda sin menciona e tremendo logro di e bolichero Elias Halabi cu a sa na triunfa den e Open di Macau, Asia unda su victoria a bira uno historico pa Aruba. Na nivel di seleccion tanto e ekipo masculino y femenino ya a logra nan clasificacion pa e Weganan Centro Americano y del Caribe cu lo tuma lugar na Barranquilla, Colombia e proximo anja 2018 den luna di juli/augustus. Un danki sigur na Lotto, e Loteria di Aruba pa medio di St. Sportsubsidie Aruba cu a subsidia e biahe di e seleccion masculino di bowling pa e evento mundial di World Bowling na Las Vegas, Nevada. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e St. Sportsubsidie Aruba.
