Awe den Corte a trata un caso penal masha lamentabel cu a tuma luga den seno familiar. E caso “incest” a sosode algun tempo atras, un tata a tene relacion sexual cu su propio yiu muhe menor di edad. E tempo di e acto condenabel aki e mucha tabatin 12 aña di edad. Awe Hues a conden’e na 6 aña di prizon!
Despues di scucha tur testigo y evalua tur prueba cu a presenta den su contra, Hues mr. Debbie Angela a dicta sentencia caminda e la castiga Davila na 6 aña di prizon pa e crimen cometi. Esey ta e mesun castigo cu Fiscal di Ministerio Publico a pidi pe tres siman pasa ora cu a trata e caso den sala di Corte. Ey a splica cu e acusado a tene relacion sexual cu su yiu muhe chikito entre 4 Juni 2016 y 31 October 2019. E pio ta cu el a graba tambe video di con e ta haci sex cu su mesun yiu, riba dianan 2 y 5 di april 2019.
Mama di e victima a descubri locual tabata pasando na momento cu Davila a cambia di celular, despues di a cumpra un nobo. Y ta aki e mama a topa cu un video caminda por a observa actonan sexual tumando luga y por a reconoce su yiu muhe den e grabacion. Den e material di video a tuma nota di Davila teniendo relacion sexual cu un menor di edad, no por a mira cara di e victima den e grabacion, pero famia y ruman di e victima a reconoce claramente cu ta trata di e propio yiu muhe di e acusado!
Hues a bisa cu a keda proba cu ta e yiu muhe mes tabata victima di e acto di incest aki, basa riba declaracion di e ruman cu a reconoce e victima na su pidjama como tambe na su stem, demas famia tambe a declara mescos. E victima a declara tanto na Corte como na e psicologo, cu desde su 12 aña e tata tabata tene relacion sexual cu ne. Di otro banda e acusado a admiti su culpabilidad na un trahado social di a tene relacion sexual cu su propio yiu muhe.
E caso a mira luz di dia ora cu diripiente actuacion di e yiu muhe a cambia, tanto na scol como na cas. A descubri cu e tabata corta su mes cu blet. Esey a pone cu e psicologo y trahado social di scol a cuminsa papia cu ne y a bin deduci kico ta pasando.
Na final Hues a bisa di no tin ningun motibo pa devia di e demanda di e fiscal cu a pidi 6 aña di castigo. A tene cuenta cu el a abusa di su yiu pa un tempo largo, cuminsando for di momento cu e yiu tabatin 12 aña di edad y riba dje a graba e acto aki.
Hues a dicta sentencia y a condena Edixon Davila na 6 aña di castigo di prizon pa abuso sexual di su propio yiu muhe. E tin dos siman pa apela si e no ta contento cu e sentencia. Abogado mr. Chairisse Edwards a defende e acusado den Corte.
