SEH di Imsan awo tin su kinderkamer

Dialuna Imsan a lansa un proyecto dedica na nos muchanan. A ripara cu hopi biaha e focus ta riba e adulto y hopi biaha muchanan ta keda un banda. Roxanna Maduro, kende ta hefe di departamento di Spoed Eisende Hulp Imsan na San Nicolas, ta splica cu ta importante pa e mucha keda trankil y dun’e bon tratamento. Si tin’e trankil, e ta sigui e tratamento, e ta bay mas lihe cas. E ta haya un bon tratamento y keda contento. E smile cu bo ta mira riba e mucha nan cara, ta trece alegria.

E proyecto a cuminsa, mirando cu ora cu tin tratamento di mucha, nan no tabata sinta keto. Nan tabata bira nervioso, nan tabata yora, nan no kier sigui cu e tratamento y a cuminsa cu pasonan chikito. A cuminsa cu un simpel mesa y stoel, a bin cu kleurboek y krijt. A ripara cu ora cu e mucha mester a sigui e tratamento, e tabata sinta kleur den e buki. A pensa cu esaki ta hopi bon. E ora a bin cu e idea pa ke hubo duna nan mas trankilidad. Pa ora cu nan yega, nan ta mira e personal den uniform, ta un motibo pa nan bay den panico. E ora a pensa pa traha un kinderkamer.

A cuminsa verf, pone algo leuk riba muraya, unda cu ta duna e mucha trankilidad. Su focus lo ta riba e muraya y ta sinti’e manera den un Disneyland. E idea a cuminsa y a wak diferente potret di kico kier pone riba e muraya. A acerca un persona cu a coopera en grandi cu e departamento. A duna un bon prijs y cada un personal a duna un contribucion, cu awe e muraya a wordo airbrushed.

Cada un enfermera, como teambuilding, a pone nan contribucion, hunto cu e dokternan. A acerca tambe dr. Rajnherc, trece e idea cerca dje y a para 100% tras di nan, cu awe a inaugura e kinderkamer.

Tin tur ekipo necesario dedica na e mucha, segun Maduro.

Dia special

Hilde Timmerman ta zorgmanager di Imsan y tambe di SEH y a conta cu nan ta orguyoso riba e team di SEH, cu hunto a pensa riba un plan chikito y a bira mas grandi cada dia. Nan mes a haci tur cos. Den e ultimo simannan, nan tabata bin cu pañanan di verf. Timmerman ta hopi orguyoso di esaki. Ta un teambuilding y finalmente ta enfoca riba e pashent, den e caso aki pa e pashent hoben di Imsan, cu tambe mester di atencion.

Pashentnan hoben

Cu pashentnan hoben ta referi na muchanan. Den e kamber aki ta atende cu muchanan te cu 16 aña. Ta un luga hopi bunita pa ta.

E ta sigui comenta cu nan ta ricibi basta pashent hoben. Tur dia nan ta haya mucha. Nan ta ricibi tur clase di trato. Un y tur cu drenta SEH ta bin cu tur clase di keho. Na Imsan, no ta tur cos nan por trata, pero si e ta algo mas serio, e ora ta mandanan pa hospital. Pero en principio e por ta pa cualkier cos.