Korver, abogado di e famianan di Mitch Henriquez, a entrega informacion nobo riba e di tres dia di huicio contra e dos agentenan cu tabata envolvi den e aresto cu consecuencia fatal di Henriquez. E Arubiano a wordo aresta brutalmente na final di Juni 2015 durante un festival den e Haagse Zuiderpark, despues di a comporta su mes na un manera provocante y a fayece un dia despues. “Segun mi e ta morto” E agentenan sospechoso ta keda para ariba cu nan tabata sa cu Henriquez tabata na bida, ora cu nan a hink'e den e transportwagen, aunke cu e Arubiano practicamente no tabata moviendo. Abogado Korver a busca e imagennan original di e grabacion for di testigonan y a mustra esakinan na specialistanan. Nan a bisa awo cu e agentenan ya caba despues di e aresto a bisa otro cu “E no ta reacciona mas,” “E ta cla”, y “Segun mi e ta morto.” Aunke cu Henriquez a fayece en realidad e dia siguiente, lo e tabata clinicamente morto den e Haagse Zuiderpark. Si e agentenan a pensa cu e tabata morto, esaki ta mustra un otro luz riba e caso y riba e investigacion, segun Korver. E abogado, kier un investigacion nobo riba e morto di Henriquez y tambe riba e modo exacto di e caso riba e dia di e aresto. Tambe Korver ta haya cu tur cinco agente cu tabata envolvi den e aresto, mester wordo persigui. Actualmente ta solamente dos ta sospechoso. Nenga Segun e compania specialisa cu Korver a envolvi, e agentenan tabata sa cu nan tabata wordo filma pa testigonan. Hues a bisa cu e rapport di e expertonan ta wordo 'evalua' mescos cu tur e otro rapportnan. Awor aki no lo bin un investigacion nobo, pero corte ta tene e rapport aki si den tur consideracion. E agentenan sospechoso den e corte na Schiphol – caminda cu e caso ta tumando luga – ta nenga cu nan a bisa cu Henriquez ta morto.
