Segun Gobierno: Ex-Minister Otmar Oduber trahando “gratis” pa pueblo

“Nos ta aprecia e hecho cu ex Minister Otmar Oduber ta contribui cu su experiencia y ta duna su consehonan boluntario na diferente nivel” asina Minister di Husticia, mr. Andin Bikker a duna di conoce ayera durante un conferencia di prensa. Esaki despues di pregunta di 24ora.com relaciona cu envolvimiento di ex Minister Otmar Oduber den diferente grupo di trabou, specialmente cu tin di haber cu construccion, compra di productonan y contract cu contratistanan den Ministerio di Husticia.

E mandatario a recorda cu Otmar Oduber tin mas di di 20 aña di experiencia den politica, tabata Parlamentario y Minister y su asistencia y consehonan na Ministerio di Husticia den cuadro di por ehempel e Comishon Supervisor (“Overkoepelend Orgaan”) pa reactiva e sector di construccion y mantencion ta tuma luga sin ningun compensacion.

“Señor Oduber tin hopi experiencia y semper ta dispuesto pa yuda, mas ainda den e crisis cu nos pais ta aden na e momentonan aki”. El a informa di su banda cu su entrada como miembro di hunta di supervision na Refineria di Aruba ta wordo deduci (kita 100%) for di su entrada como ex mandatario, mescos cu ta e hecho cu su entradanan cu ta ser genera den sector priva, manera cu e ley ta stipula.

Bisando esey, Gobierno a confirma cu Otmar Oduber no a tuma despedida di politica y di gobernacion, manera el a anuncia na september aña pasa, sino a keda awor como Consehero di Minister. E unico cos, segun Minister Bikker, ta cu Otmar Oduber no ta cobra separa di e “overbruggingstoelage” cu e ta haya pa 1 aña largo despues di retira di e puesto di mandatario. Na december proximo e no lo cobra e “toelage” di Minister mas.

Mester menciona cu den e mesun conferencia di prensa, a puntra Minister Andin Bikker cua ta e compania di construccion cu a haya e trabou pa sea renoba of huur of “bende” trailernan pa pone riba tereno di ex Huis van Bewaring na Dakota pa cera ilegalnan deteni na Guarda nos Costa. El a contesta di no sa y di lo bay check. Nos ta pendiente ainda di e contesta aki, pa sa cu ken Otmar Oduber a “deal” e contract aki y si a bay destaho publico y si e compania ta yega na e ex-mandatario. Den boca di pueblo ta insinua cu lo ta un medio di comunicacion, cu ta duna Oduber hopi acceso, cu lo a haya e trabou aki. Pero, nos lo ta pendiente confirmacion di Minister Bikker riba e tema delicado aki.