Diamars anochi a tuma e tiramento di lot pa asina saca e secuencia di cada un participante cu lo presenta diabierna 20 di januari den Aruba Entertainment Center.
Haydy Boekhoudt, Miembro di Comision Tumberito/Calypso & Roadmarch Infantil y Hubenil, a cuminsa na bisa cu den pre-infantil tin dos participante pa Roadmarch, Infantil Tumba tin cuater participante, infantil Roadmarch tin dos participante, Tumberito Hubenil tin cinco participante y den Roadmarch Hubenil tin seis participante. Tur participante tin nan secuencia caba pa diabierna.
Na prome instante e idea tabata pa haci e festival ‘om en om’, pero despues di a scucha e conseho di e musiconan, nan a ripara cu e festival lo no cana manera cu nan ta pensa y p’esey a dicidi di cambie toch. Nan lo habri e festival cu e pre-infantil di Roadmarch, sigui di biaha cu infantil tumberito, sigui pa infantil Roadmarch. Despues lo sigui cu Tumberito Hubenil y ta cera Calypso & Roadmarch hubenil.
Actualmente esunnan cu ta interesa, por haya un carchi na prijs di ‘early bird’ cerca e participantenan. Subi e facebook di SMAC, y busca e participantenan unda cu por contact cu e muchanan pa asina haya e carchi na 20 florin. Ora cu e carchinan aki caba, por haya carchi via pay.aw y e prijs ta mescos, 25 florin na adulto y 10 florin pa mucha.
Por ultimo, Boekhoudt a informa cu SMAC ta traha na bienestar di e muchanan. Tin un team grandi cu ta trahando duro, dia y anochi, pa asina pone un tremendo festival ariba pia pa diabierna awo.
