E miembronan di sector di cuido, cu ta consisti di diferente asociacion, fundacion, como tambe e trahadonan di hospital y tambe sindicato ABV (Arubaanse Bond voor Verpleegkundigen), a formula un carta, cu nan a manda pa tanto minister di turismo y salud, Dangui Oduber y Parlamento, unda cu nan ta pidi pa trek in e medidanan di AZV.
Den e carta ta indica cu na juni 2020, a duna instruccion na AZV pa haci un recorte den tanto presupuesto y e tarifanan di salud den un 5,5%, como un di e medidanan dje 5-wave model. E maneho di gobierno aki a sigui e acuerdo cu pais Aruba a haci bao di Landspakket Zorg cu Hulanda.
Riba un manera comparabel, gobierno a decreta un medida cu ta corta den e salario di e ambtenaarnan cu un 12,6%. Mientrastanto, mediante un Landsbesluit di dia 29 di december di 2022, prome minister a anuncia e kitamento di e ultimo medida aki entrante dia prome di januari di e aña aki.
E miembronan di e sector di cuido, den e carta, ta boga pa decreta dicho decreto tambe, encuanto e aanwijzing otorga na e Organo Ehecutivo y pa revoca e reduccion aplica pa AZV entrante dia prome di januari 2023. Tambe, e miembronan a pidi p’e 12,6% di recorte na SABA para por completo.
Den e ultimo dos aña y mey, e sector di cuido a demostra su solidaridad cu Land Aruba, cooperando den e sentido mas amplio cu e medida menciona. Esaki, manera cu ta conoci, tabatin su consecuencianan den e structura y sostenibilidad di asistencia di cuido.
“Ta complace nos sa den varios front, cu economia y finansa publico di Aruba a recupera te tal punto cu e recorte di salario di e ambtenaarnan, e ministernan y ekivalente, lo suspende den cuadro di e Landsbesluit dia prome di januari 2023,” e carta ta sigui bisa. Tambe a anuncia publicamente cu AZV ya no a registra deficit y hasta a crea un surplus den e ultimo periodo. Cu mayor motibo, e sector di salud ta pidi, den cuadro di igualdad di condicion, tambe den nan interes y perspectiva, pa retira definitivamente e medida aki.
E miembronan dje sector ta spera cu inpaciencia e anuncio dje fin di e medida y lo kier a hiba dialogo di loke nan ta kere cu ta necesario pa confronta hunto e retonan cu e sector di salud cu lo tin p’e proximo aña, ta loke e carta a bisa finalmente.
E carta aki ta firma pa e representantenan di Stichting Ziekenverpleging Aruba, Instituto Medico San Nicolas, Horacio Oduber Hospital Aruba (HOH), FSMA Respaldo, Stichting Algemene Bejaardenzorg Aruba (SABA), Huisartsenvereniging Aruba (HAVA), Botica’s Vereniging Aruba, Asociacion di Specialista Hospital Aruba (ASHA), Vereniging Private laboratoria Aruba, Vereniging Medisch Specialisten Aruba, Vereniging van Apothekers Aruba, Arubaanse Bond voor Verpleegkundigen (ABV), Vereniging van Verloskundigen Aruba y por ultimo Aruba Dental Society (ADS).
E carta a bay fuera di e minister encarga cu e sector di salud, pa gobernador di Aruba, parlamento y AZV.
