Sector cuido tin miedo: Morto lo cay innecesario si sigui baha gasto

879

Stakeholdernan di sector di cuido tabata den sala di parlamento pa topa cu comision di salud y cuido. Nan a haya chens di expresa nan preocupacion grandi y a pidi intermediacion di parlamento tambe pa pospone cortamento di gastonan di AZV pa seis luna.

E miedo cu tur tin ta cu e reduccion di gastonan cu 5 miyon pa luna y 60 miyon pa aña tin su efecto grandi riba no solamente salud, inclusive tin su repercusionnan riba Aruba su turismo. E bishitantenan, principalmente e grandi, lo pensa cu e calidad di cuido di Aruba no ta bon mes y no ta un luga sigur pa nan bishita y haya nan cu sorpresa di bira malo.

Na final di e encuentro a combersa cu Jacco Vroegop (Presidente di Hunta di Directiva di dr. Horacio Oduber Hospital) dr. Joel Rajnherc, director di Instituto Medico San Nicolas (IMSAN) y Babet Latour, Presidencia di Asociacion Specialistanan di Hospital Aruba.

E union bou di e grupo aki tabata visibel. Cortamento den e gastonan di AZV tin consecuencianan grandi pa e comunidad. “Mayornan  y nan yiunan no ta haya e tratamento cu nan mester di dje. Hendenan ta bay muri (innecesariamente) si sigui cu cortamento den e gastonan,” tabata loke Vroegop a expresa na salida di e encuentro aki. P’esey a haci proposicion pa hunto bay Hulanda pidiendo tempo pa mira kico por y kico no por.

E urgencia y emergencia di e reunion aki di sector di cuido cu parlamento ta cu e gastonan t’asina grandi cu e cortamento di 5 miyon via di AZV, no ta sigui duna e chens pa brinda un cuido (tratamento) di calidad y cantidad. Ranjherc a recorda cu e cantidad di cuido a aumenta drasticamente door di e pandemia, rond mundo. E gastonan no tin dj haber solamente e momentonan agudo ora cu e pashent ta interna a aumenta, pero e duracion di e complicacionnan ta trece hopi mas gasto. Banda di esaki, no mester lubida cu poblacion ta enveheciendo y esey  tambe ta costa hopi placa. “Esey ta parti di un splicacion pakico tanto placa extra mester bini di AZV den e ultimo aña,” director di IMSAN a bisa.

Ta sigui un maneho pa haci mas tanto tratamento na Aruba y evita di manda pashentnan pa exterior. Esey ta haci cu e calidad di cuido ta subi.

Sector cuido tin miedo: Morto lo cay innecesario si sigui baha gasto

Sector cuido tin miedo: Morto lo cay innecesario si sigui baha gastohttp://24ora.news/3sE0zSO

Posted by 24ora on Friday, January 15, 2021

E pandemia no solamente a trece problema di salud. Pero e ta trece hopi sufrimentonan economico, door di perdemento di trabou y esaki ta keda refleha den salud di e ciudadano tambe. Hustamente den e situacion aki, presidente di ASHA Babet Latour, a bisa ta bini e decision cu mester baha gastonan den salud publico cu 60 miyon florin pa aña. Si bay baha  mas den gasto di cuido, ni ASHA ni otronan di e sector no por garantisa di por brinda e calidad di cuido cu Aruba ta conoci p’e. “Nos tin un bon sistema di salud, ofrece un bon cuido. Bahamento di gasto tin su efecto riba esaki. Por ehempel ora un baby ta nace prematuro, pero no tin un pediatra cla para pa atende cu cualkier eventualidad.”

Aruba, Latour a splica, ta un isla chikito. No por simplemente hinca un pashent den un ambulance y transporte pa un clinica specialisa mas leu. Mester trata tur hende aki mes, pero “si mester sigui cu spaarmento den gastonan di cuido, nos mes no por bay haci tur esaki mas.”