Nos ta den e recta final di e temporada di carnaval, faltado apenas dos parada mas pa e finalisa. Pero esaki no ta bay sin tip hopi importante y necesario cu por yudabo pasa door di e dianan aki.
Cruz Cora lo bay t’ey pa duna asistencia durante e ultimo dos paradanan. Pa loke ta e parada di San Nicolas, nan ta bayendo cu mas of menos 35 pa 50 boluntario den diferente posicion.
Nan ta bay ta den tur e 11 gruponan. Ta pidi tur hende pa nan ta consciente riba dos cos. Apesar di e 20 puntonan importante cu a publica, tin dos cos cu nan ta stress riba dje cual ta Sunblock y Earplugs.
Tin hopi mayor ta bin cu mucha pa disfruta di carnaval pero nan no tin earplug y cada persona cu ta den grupo den e zonido, den 10 seconde bo por perde parti di bo oido. Cruz Cora ta stress hopi riba dje pasobra tin hopi mucha chikito y nan ta sin earplug. Quota Club ta riba caya ta bende earplugs, pero Cruz Cora tambe tin di nan mes ta donate y yuda. Nan ta haya hopi pica pa e muchanan oido. Cada rato cu nan tey cu un tiki boroto, nan por perde parti di nan oido.
Tambe bebe hopi awa, pasobra bo curpa mester tin hopi likido. Door di e solo bo por deshidrata. Tambe ta pidi pa cana cu handsanitizer. Awendia tin hopi tipo di malesa. Pues sea consciente.
Cruz Cora tambe ta pidi pa ora nan mira ambulance y Cruz Cora para, no blokia e entradanan. Tabata tin hopi molester e ultimo paradanan cu ora cu kier sali for di un otro post of duna asistencia, e ora no sa cu ken tin cu deal pa hala auto. E ora mester haci uzo di un takelwagen.
Por mira e boluntarionan bisti den nan uniform, acerca nan. Nan tin un post den Lagoweg na Maurik. Por mira nan post tambe na Watertoren, Springfield, Pastoor Hendrikstraat, etc. Si mester di cualkier ayudo, acerca nan.
Ruta di diadomingo nan tin post na Banco di Caribe, den George Madurostraat, riba Adriaan Lacle, na Julianaschool, tambe na Renaissance y na oficina mes.
Aki ta sigui e 20 yabinan di conscientisacion pa abo como carnavalista tene cuenta cun’e.
1. Bebe hopi awa.
2. Come bon
3. Laga muchanan come bon prome cu sali for di cas (no uza mayonaise den nan cuminda.
4. Uza alcohol moderadamente.
5. Uza earplugs y sunblock pa evita consecuencia den futuro cu cuero y oido.
6. Mayornan, laga baby y muchanan bao di 5 aña na cas. Mayornan tene bon bista riba boso yiunan, skirbi nomber y number di bo yiu, pone riba un banchi y pone na su pols of na un cadena pa identificacion pa por si acaso e perde. Siña e muchanan pa nan corda number di telefon for di cabes.
7. Cana semper cu e carchi di AZV
8. Cana cu un carchi cu tur bo medicamentonan cu bo ta uza tur dia.
9. Corda uza bo medicamento prome cu sali for di cas.
10. Si bo ta un pashent di curason, no bay parada.
11. Uza bril di solo y pechi pa proteha bo mes contra solo.
12. Corda wak bon na unda tur e bañonan publico ta y por fabor laga nan limpi pa otro por uza pa evita cualkier malesa. No laga muchanan bay baño sin supervisio di un adulto.
13. Aleha di pelea y sigui instruccion di polis.
14. Pidi bisiña pa tira bista riba bo cas.
15. No Para bo auto aleha for di bista di hene.
16. Preferibelmente cana cu un “First Aid Kit” chikito pa famia.
17. Si bo ta bay den parada uza sapato comodo.
18. Si bo ta uza “shoulderpiece” wak pa e ta bon fura.
19. Si bo ta bebe hopi den parada, wak pa bo no core auto.
20. Coopera cu polis, ambulance y Cruz Cora.
Cruz Cora ta boluntarionan cu ta traha di curason. Nan ta un solo boluntario, trahando pa pueblo di Aruba. Cruz Cora ta desea tur hende riba caya un dushi Carnaval.
