Gobierno di Aruba den diferente documento di vision pa futuro ta papia extensamente riba importacia di crea un asina yama “Circular Economy” pa nos pais. Esaki ta bin pa dilanti den diferente foro manera di sostenibilidad, innovacion, Banco Central y hopi mas. Loke ta masha straño ta cu un Ministerio ta boga pa un ley di Serlimar cu tin como e obhetivo final pa procesa tur desperdicio den un mass burn incinerator cu no ta cuadra cu e vision di Gobierno pa un economia circular.

E tipo di economia asina ta basa riba reciclahe, o sea, reuza productonan cu ya tabatin un uzo caba. EcoGas por ehempel ta atende cu carton, aluminium y hero, pa bolbe uza nan. Na Serlimar por ehempel Gobierno mes ta promove pa hiba desperdicio cu por reuza manera palo, cu por traha muebles cune.

E ta hala atencion pasobra mientras Minister Presidente y Minister di Finansa ta promoviendo economia circular, cu por crea cupo di trabou adicional den nos mercado laboral, di otro banda Minister Otmar Oduber ta bayendo “full swing” cu su mass burn incinerator den cual ta kima tur desperdicio y no por uza nada mas. Ta hopi obvio cu no tin un concordancia den Conseho di Minister riba e tema aki. Ni tampoco den Ministerio di Oduber mes pasobra di un banda e mes ta papia di economia circular pa hiba desperdicio na Serlimar na Pos Chikito, y den mesun rosea kier kima tur sushi di Aruba, laga do 20% atras pa dera riba un dump nobo cu lo crea banda di WEB na Balashi.

E contradiccion ta asina profundo cu e ta pone na riesgo cu henter un Gobierno elegi pa pueblo por bay cas pasobra un mayoria den Parlamento ta contra di e ley. Hecho ta cu for di punto di bista di medio ambiente, un mass burn incinerator no ta bon y tur experto di fama internacional riba e materia ta comparti e opinion aki. Na Aruba mes mayoria instancia, gremio, asociacion y Parlamentario tambe ta comparti e opinion aki.

Mester menciona cu entretanto Gobierno ta bishitando gremionan, buscando sosten, argumentando cu a haci hopi cambio den e concepto di cambio di ley existente di Serlimar. Sinembargo, NO tin ningun cambio fundamental manera cu a palabra cu lo haci. Hecho ta cu ainda no ta mucho cla unda e sushi (MSW) lo bay ora e cambio di ley drenta na vigor. Tambe no ta sigur si ainda lo tin un tipping fee ora trece sushi na efacilidad di Serlimar of si esey ta cubri door di e afvalstoffenheffing

Sano huicio mester prevalece sin pone pueblo bou di tanto stress y atende cu tanto otro preocupacion cu ta den scochi di Gobierno.

Comments

comments