Screening di shortfilm “Pariba” dia 15 di Juni

E shortfilm yama “Pariba” ta basa riba dos mucha muhe kendenan ta miho amiga. E problema ta cu un di nan ta bayendo Hulanda pa studia y ta papia di con esey ta afecta e amistad y kico nan ta bay haci.

Nan tin tradicion pa bay Lighting Parade p’ariba tur aña y door cu un di nan ta bayendo e ta afecta nan. Elize v/d Linden, co-creador y co-escritora di e shortfilm “Pariba”, a splica di e pelicula, con dos persona no ta bay wak otro mas manera nan ta awo.

 

Idea

E idea a bin di experiencianan personal di v/d Linden. E tambe a bay Hulanda y su miho amiga mester a keda Aruba un aña mas. E ta mas tanto basa riba e experiencia ey. Ta pa habri dialogo cu  hendenan na Aruba y hende na Hulanda, di con dificil e ta pa dal e paso eynan pa bay Hulanda, unda cu tin mas oportunidad, aunke ta un paso hopi duro pa tuma y no ta algo cu hende ta papia di esaki ainda.

E proyecto

Durante cu a bin pa un proyecto, a filma un shortfilm. A skirbi e script den un of dos luna. Despues a haci e preproduccion, tambe a busca fondo di UNOCA, di Prins Bernhardfonds como tambe via Crowdfunding. A haya basta fondo, aunke chikito ainda, pero suficiente cu por a paga pa mas hende bin yuda. Despues a busca director of photography, e actriznan, productornan, editor, sound design. A haya tur e hendenan aki den un of dos luna di tempo. A filma tur cos den cinco pa seis dia. Despues e postproduction tabata dos luna mas of menos. A haya un persona di Aruba mes, esta Efraim Angela, kende a haci e musica. Awo ta bay haci e screening, cu ta e version final dia 15 di Juni na Cas di Cultura pa 7’or di anochi.

E plot

E shortfilm ta mas of menos 15 minuut largo. E ta un “slice of life, coming of age” y ta enfoca riba e audiencia di studiantenan na Hulanda y na Aruba of alumnonan cu ta bayendo Hulanda. Mas enfoca riba e hoben adulto. Kier habri dialogo cu tur hende. Tambe mayornan di e studiantenan cu ta bay Hulanda of ta studiando na Hulanda. Kier pa hende wak cu  e tin un efecto ora muchanan bay studia na Hulanda.
Mas cu esey e plot ta e dos amiganan cu pa hopi aña ta haci cos hunto, tur dia nan ta wak otro, nan ta bay e mesun scol y den un dia so, tur cos ta casando. Y aki por mira con nan ta sali for di scol, bay Taco Bell manera semper. Despues nan ta bay Lighting Parade, nan ta fiesta y despues na final tin nan momentonan final hunto, prome cu bay Hulanda. Por mira cu nan a caba te na Sero Colorado na fin di e anochi di Lighting Parade p’ariba.
Durante e anochi aki, lo screen e shortfilm dos biaha. E punto ta uc nan kier haci mas evento asina pa promove otro proyectonan di Aruba of porta tambe Corsou of Boneiro, pa tin mas conexion, pa trece mas atencion pa proyectonan asina.