Desde eleccion na Aruba di dia 22 di September ultimo, tabata obvio cu e deseo di e pueblo votado ta dificil pa ehecuta, pero partidonan politico no tin otro opcion, cu cumpli cu deseo di e votadonan. Den esey a duna AVP 9 asiento, MEP 9 asiento, POR 2 asiento y RED 1 asiento. Cu esey, Aruba ta bay 20 aña atras y mester forma un coalicion. E ultimo coalicion tabata di aña 1997, entre AVP (10) y OLA (2).
Ultimo dianan a scucha varios fecha pa huramenta y inaugura Gabinete Wever, pero cada bes ta pospone pasobra no a keda cla cu un detaye. E ultimo cu ta scuchando ta relaciona cu e proceso di screening di futuro mandatarionan, esta e 8 personanan cu lo ocupa un puesto ehecutivo den Conseho di Minister.
Ta bon pa menciona cu na aña 2009, despues di eleccion ex-Minister Presidente Nel Oduber a pasa un maneho nobo pa cu screening di “politieke ambtsdragers”. Den esey a reenforsa e reglanan pa un persona por ocupa e puesto di Minister y tambe a adapta e proceso di screening. Bisando esey, e departamentonan concerni den e proceso aki, esta Siguridad Nacional (VDA), SIAD (Belasting) y Ministerio Publico, mester tene nan mes na e mesun reglanan aki.
Den gangnan ta bisando cu lo tin problema cu un of mas candidato pa bira Minister, pero ainda Formador no a comenta riba esaki, pues ni a admiti cu tin hende no ta Ministeriabel ni a desmenti tampoco. Esey riba su mes ta laga espacio pa duda y pa rumornan persistente core riba rednan social durante e ultimo dianan aki.
Hecho ta cu ainda Parlamento no a saca invitacion pa reunion pa trata e “geloofsbrieven” pa e futuro Ministernan, mester anuncia e candidatonan nobo pa bira Parlamentario y acepta retiro di esunnan cu lo bay pa bira Minister. Aunke e ta un proceso normal y cu hopi biaha ta bay lihe, den e caso aki ta yegando dos luna despues di eleccion y ainda nada.
Kico VDA a señala como punto di atencion den e rapport di un of mas futuro Minister, no ta conoci. Mester tene na cuenta cu OM ta atende cu casonan andando of castigonan ehecuta, SIAD ta atende cu comportacion fiscal, pero Siguridad Nacional ta atende cu locual ta ser bisa di bo.
Riba dia 12 october 2017 a nombra Formador y na final di su trabou, e mester traha un “eindrapport” cu un conseho na Gobernador pa formacion di e siguiente Gabinete. Den e proceso aki, Gobernador ta trahando como organo di pais Aruba y ta resorta bou di Minister Presidente. Ta den caso cu e bira un “asunto di Reino” e ora ey e lo resorta bou di Presidente di Conseho di Minister di Reino Hulandes. Te cu awor esey no ta asina y aunke e ta zona straño, Gobernador den e trayecto actual, ta resorta bou di Prome Minister Mike Eman.
Por corda cu hopi aña pasa, ora cu Gobernador Koolman a nenga di nombra Glenbert Croes como Minister, cu AVP a bringa masha duro contra e forma aki y a bay Hulanda pa toch nombra Croes como Minister. Pa algun luna su ruman Junior Croes a sinta na su luga y despues Willem Vrolijk tambe.
E discusion e tempo aya tabata si Hulanda tin e poder pa dicidi ken ta Ministeriabel na Aruba of no. Algun dia pasa ex Minister Presidente Nel Oduber a skirbi riba red social cu Gobernador mester tene cuidao pa e no kima su dedenan pasobra e no tin nada di bisa den e proceso aki di formacion. No ta conoci si tin un disputa caba pa cu formacion, pero el a manda un mensahe publicamente pa e representante di corona Hulandes na Aruba.
Internamente den MEP tambe por sinti cu tin desunion relaciona cu e forma cu ta atendiendo cu formacion. Karel Maduro por ehempel a publica riba su pagina di Facebook cu e no lo drenta Parlamento aunke e tin e votonan pa esey. Lamentablemente, aunke MEP a promove cambio di maneho pa drenta Parlamento y hasta a presenta un ley na Parlamento, toch nan mes no ta logrando pa ehecuta nan vision den nan mesun partido. Awor aki algun candidato cu poco voto lo drenta Parlamento toch, pasobra nan ta bay pa number en bes di voto.
For di fuentenan bon na altura den e proceso di negosacion, nos a compronde cu e proceso ta den su fase final pero ta duda cu lo keda cla pa huramenta e siman aki ainda. Probablemente e lo bira otro siman, si no tin problema cu “screening” di e 8 Ministernan. Otro fuente a divulga cu a manda mas cu 8 nomber pa screening, pues cu Formador a hunga “safe” pa por si acaso tin problema cu un of mas di e candidatonan. Esaki tampoco no ta confirma ainda, pasobra e departamentonan envolvi no ta duna informacion riba screening di ningun hende.
