Scol di Musica Rufo Wever a cera aña escolar 2018/19

Awe mainta a tuma luga e evento na Cas di Cultura den cual Scol di Musica Rufo Wever a cera aña escolar 2018/2019. Por lo menos 130 alumno di e 650 alumnonan total di e scol a participa awe. E evento aki ta un tradicion, den cual e alumnonan ta haci un presentacion na final di e aña escolar.

Chucho Hoek, Director di Scol di Musica Rufo Wever a duna di conoce cu ta duna les di diferente instrumento, por ehempel violin, trompet, piano, guitara, drums, percucion y asina lo por sigui menciona. Tur esaki banda di cantamento, cu tambe ta masha popular na e scol di musica. Ta cuminsa tuma alumnonan for di 6 aña di edad caba, te na adultonan.

Scol di Musica Rufo Wever a cera aña escolar 2018/19

Scol di Musica Rufo Wever a cera aña escolar 2018/19. Click pa mas https://24ora.tv/2IzUCjx

Posted by 24ora on Sunday, June 9, 2019

Ta bon pa enfatisa cu tin mas interes pa cierto instrumentnan. Lamentablemente tin algun instrumento cu ta menos popular bou di nos muchanan. Asina Chucho Hoek a subraya e atencion special di hobennan awendia pa siña toca piano, guitara y drums. E conocido musico Chucho Hoek a admiti cu un otro instrumento masha popular y den demanda grandi awendia ta violin.

Tur esaki banda di e interes creciente di canto, den cual mucha, hoben y adulto kier sea siña canta of tin biaha tambe kier mehora nan habilidad di domina nan bos pa por canta.

Mayornan interesa pa nan yiu por sigui les di musica, por tuma contacto libremento cu Scol di Musica Rufo Wever. Nan ta duna les na 4 diferente luga, dos na Playa, un na San Nicolas y un na Santa Cruz. Por yama oficina na 5822888 entre 1:30pm pa 6:30pm of pasa bishita nan na di dos piso di Cas di Cultura.

Comments

comments