Scol Basico Santa Filomena a ricibi tablet pa por yuda su muchanan

Awe sigur tabata un dia grandi pa Scol Basico Santa Filomena, ya cu nan a ricibi oficialmente 17 tablet. Sigur esaki ta un bendicion pa e scol di parti di Hungateca, cu a bin cu e proyecto, cu sosten di Kiwanis Club of Palm Beach.

Directora di Hungateca, Yamila Hoevertsz-Kock, a comenta cu e aña aki nan a adopta e scol pa e gesto aki y ta gradici naturalmente tanto e director di SKOA, Aneusca Baly y tambe Kiwanis Club of Palm Beach, cu tabata tin e bondad, gentilesa y amor pa por a haci donacion di e tabletnan pa di e manera aki e muchanan por haya remedial teaching.

Scol Basico Santa Filomena a ricibi tablet pa por yuda su muchanan

Scol Basico Santa Filomena a ricibi tablet pa por yuda su muchanan. Click link pa mas https://24ora.tv/2D1zrEo

Posted by 24ora on Tuesday, November 19, 2019

Nan ta haya programanan special cu e maestronan por uza pa e muchanan cu sea no ta compronde un materia bon, por haya splicacion na un manera hugueton of e muchanan cu ta asina fast, cu ta sinta fada nan mes, e ora e maestro por bay riba e scholar project app, cu ta reta nan celebro. Hungateca ta hopi gradicido cu nan a haya e oportunidad aki.

Cada klas ta haya dos tablet. Scol Santa Filomena tin 8 klas, e no ta hopi, pero ta un comienso. Tin e conviccion cu pa otro aña escolar, por tin mas tablet pa mas mucha y asina e ta sigui crece.

Kiwanis Club of Palm Beach

Ivan NG, presidente di Kiwanis Club of Palm Beach, a comenta cu Hungateca ta un fundacion cu a acerca nan pa un proyecto di scol. Nan mes no tabata sa mucho y ora cu a acerca nan, nan mes a haci un sondeo pa mira kico e fundacion ta. A saca afo cu di e forma aki e muchanan ta haya un otro forma,  principalmente pa e scol y maestronan cu tambe ta buscando diferente manera pa por mustra of guia e e studiantenan pa nan tin un miho educacion. Nan a yega na e conclusion cu e ta algo cu Kiwanis lo kier participa y duna su contribucion na dje. Mas pasobra e organisacion tin un programa cu yama Youth Community Priority One Program, y ta algo cu por hinca bou di e programa aki. Kiwanis ta sostene tipo di proyectonan asina y awo lo sigui di cerca e progreso y mira kico mas nan por haci den futuro.

A cuminsa cu Filomena College.

Hungateca ta estableci na YMCA na San Nicolas y for di e desaroyonan por mira kico por bay haci.

E programa

E programa aki ta concentra na Hulanda for di grupo 1 pa grupo 8. E ta e parti di scol basico. Mas cu esey no lo bay. E manera di hunga ta special pa nan, pa nan tin un otro manera pa por haci rekenen, pa por haci taal.

E scol

Cabesante di Colegio Santa Filomena, Mario Nooyen, a comenta cu e scol ta bendiciona cu Hungateca ta traha hunto cu e scol y awo cu e regalo di Kiwanis Club, e mester bisa cu esaki ta algo super pa e muchanan. E ta un material educativo caminda cu nan por mehora nan habilidadnan, pa prepara nan bon pa nan futuro. E scol ta hopi orguyoso y e muchanan awo por traha cu esaki. Pa un tempo caba e scol ta trahando cu Hungateca. E scol tabata tin un make over y awo cu e tabletnan aki, ta hopi bon. E cabesante ta gradici Hungateca como tambe e ayudo di Kiwanis.

Digitalisacion

E parti di digitalisacion, segun Nooyen a cuminsa cu flatscreens den tur klas. Nan a cuminsa e aña aki cu klas 2 y 3. Awor aki e proximo paso ta e tabletnan, cu ta yuda e muchanan mas lihe cu nan tempo. Awo e muchanan por traha segun su nivel, segun su propio tempo. Falta hopi ainda y tur cos ta depende di placa, cual hopi biaha sa ta e problema. E scol ta haci su best pa logra hopi mas lihe posibel.

SKOA

Como SKOA, nan ta sostene e parti di digitalisacion den su scolnan. Nan ta contento cu Hungateca a adopta un di e scolnan basico na San Nicolas y hunto cu Kiwanis Club of Palm Beach, SKOA no por keda sin aplaudi esaki. Director general di SKOA, Aneusca Baly a comenta cu ohala hopi otro instancia ta asina, cu ta haci cu nan por yega na e meta cu tin pa en todo caso, dentro di cinco aña, caminda tur scol por ta digitalisa.

Awendia tur mucha mester ta prepara pa su habilidadnan di siglo 21. E ta un paso chikito, pero bo ta cuminsa na gatia, prome cu bo cana. Ta mira esaki como prome paso. E no ta bay ta e ultimo paso, pasobra tin di compronde cu Kiwanis Palm Beach lo sigui monitorea e proceso aki y tambe nan lo sigui wak con nan lo por sigui inverti tambe den e caso aki Colegio Santa Filomena.

A menciona cu e proyecto di e programa Scoola, cu ta di kleuter pa basis, unda cu por introduci esaki den kleuterschool, cu ta net p’ariba di Filomena Basis. Asina aki por sigui cun’e den scolnan secundario.

E tin su costonan

Tipo di proyectonan asina costa placa y lo dura cinco aña pa digitalisacion keda cla, pero SKOA no tin e fondonan. Ta haci diferente apelacion. A haya den e caso aki ya caba un di e scolnan Cacique Macuarima y Aterima, a wordo adopta pa Futura. Ta spera cu dentro di cinco aña tur scol ta digitalisa. SKOA tin hopi scol. Nan tin 46 scol basico y ta basta placa tin mester pa sostene tur e scolnan . Tin cu duna tempo, pasobra no ta algo cu bo ta bisa cu tin e placa riba planchi y bo ta piki’e y bay cun’e. Mare e tabata asina, segun Baly. Pero ta gatia prome cu cana pa tin algo cu ta keda en todo caso sostenibel pa e scolnan.

Tin un projectdossier di casi 12 miyon pa tur scol. Esaki ta encera duna e docentenan tambe e scholing pa por haci esaki den e klasnan. No ta cuestion cu ta wak solamente di pone e tabletnan na scol, pero ta wak esaki den su totalidad. Di parti di SKOA a cuminsa pone Wifi na scol. Tin algun di e scolnan cu diferente fondo tambe ta haciendo cu nan tin iPad, nan tin nan Chrome books. Tambe SKOA a cuminsa aña pasa dunando docentenan tambe scholing, caminda cu tin por lo menos 10 docente cu a gradua como ICT Coach. Y asina ta sigui cu pa dentro di cinco aña cu den cada un di e scolnan tin un ICT Coach. Pero si tin algun hende cu kier duna e fondonan completo, SKOA ta acepta naturalmente cu man habri.