Scol Basico Dornasol lo sigui crece den futuro

Scol Basico Dornasol a habri su porta recientemente a base di e necesidad cu tin pa sierto studiantenan na Aruba.

Minister di Enseñansa, Michelle Hooyboer-Winklaar a mira e necesidad hopi grandi pa cu esaki y a desaroya un plan 2 aña pasa pa asina lanta un scol bou signatura "Cluster 4". Esaki ta e prome Cluster nivel 4 na Aruba. Cabesante di Dornasol, Rosy Abreu-Vasco ta orguyoso di e scol aki.  E scol ta traha pa muchanan cu ta bin di Enseñansa regular, cu ta muchanan inteligente pero tin problema specifico cu ta manifesta su mes cu conducta cu tin mester di guia specialisa. Aki ta papia di conducta hopi severo, pero tambe cu tin un tipo di “stoornis” manera ADHD of nan tin “sterke wil” y nan ta muchanan cu ta rekeri medicamento. Esey ta e tipo di muchanan cu tin na e scol, pero e muchanan ta hopi inteligente cu mester ta den un regulier onderwijs, e cabesante a enfatisa.  Enseñansa regular tin hopi prikkel y klas grandi, pues den Cluster 4 ta papia di klas y grupo chikito. Tambe nan tin un team multi disciplinario pa traha cu e muchanan. Klas 2 ta uno di
combinacion di 1 y 2 hunto, pero tambe tin klas 3.

Pa futuro e scol lo crece, pasobra otro aña lo bin klas 4 y e lo sigui crece te ora yega 6de klas.  Den cada klas na e momentonan aki tin 8 mucha y cu e scol chikito aki, e team ta consisti di 16 hende, segun e cabesante. Den cada klas tin 3 assistent di klas, e maestro di klas, tambe tin un coordinador di enseñansa, un coordinador di cuido, un interior coordinator, tambe personal administrativo, School Pedagogisch Hulperverlener y un School Maatschappelijk Werker.  Cabesante di Dornasol a vocifera su aprecio pa e compromiso cu Minister Hooyboer-Winklaar tabata tin pa lanta e scol y duna e muchanan aki un chens pa por wordo reintegra den Enseñansa regular eventualmente, dunando nan mas oportunidad.