Santa Rosa ta felicita tur Cunukero, Criador y Piscador riba “Dia International di Alimentacion 2019

174

Pa un persona of un pais por logra yega na cero hamber no solamente bo mester atende cu e problema pero, bo mester alimenta e individuo pareu cu bo ta alimenta e mata. E aña aki Dia Mundial di Alimentacion ta haci un yamada di accion na tur sector pa haci dietnan saludabel y sostenibel disponibel y pagabel pa tur hende. Na mesun momento haci un yamada na tur persona pa cuminsa pensa den loke nos ta alimenta diariamente.

Den ultimo decadanan nos a cambia drasticamente nos diet y forma di alimentacion como resultado di globalisacion, urbanisacion y e crecemento di ingreso. Nos a pasa di platonan saludabel di berdura y rico na vibra pa dietnan cu ta halto den hariña refina yena cu salo, sucu, y vet pa diet di cumindanan procesa, carni y otro productonan cu ta deriva for di animal. Awendia ta dedica menos tempo pa prepara un cuminda saludabel na cas. Consumidonan, specialmente den zonanan urbano ta depedende cada dia mas di supermarket, localidadnan di cuminda rapido, (Fast Food Restaurant) kiosko di cuminda y restaurant cu ta ofrece cuminda pa hiba (takeaway)

Un combinacion di diet menos saludabel y estilo di bida di hopi oranan sinta a aumenta e tasa di obesidad no solamente na paisnan desaroya pero tambe na paisnan di menos ingreso unda hamber y obesidad ta pareu. Na e momentonan aki tin mas di 670 miyon di adulto y 120 miyon di mucha di 5 pa 19 aña ta obeso. Mas di 40 miyon di muchanan menos di 5 aña ta sobrepeso. Mientras cu mas di 820 miyon di persona mundialmente ta sufri di hamber.

Un diet menos saludabel ta e principal factor di malesanan no transmiti, incluyendo enfermedadnan Cardiovascular, Diabetico, cierto tipo di malesanan di Cancer. Esaki tin un vinculo di 1/5 parti mundialmente di personanan cu ta fayece. E habito y alimentonan menos saludabel aki tambe tin su efecto negativo riba e presupuesto nacional di salud cu por costa casi 20 miyon dollar pa aña.

Obesidad y otro formanan di desnutricion ta afecta casi un di cada tres persona. Proyeccionnan ta indica cu lo aumenta na dos di cada bes persona pa aña 2025. E bon noticia ta cu ta existi solucionannan cu por logra reduci tur forma di desnutricion, pero ta desea un compromiso mas grandi y na nivel mundial.

Comparacion cu Aruba

Si compara Aruba cu locual ta e topico di Dia di Alimentacion 2019, por mira cu na Aruba tambe nos ta den e mesun situacion pero no di e magnitud cu tin hendenan ta sufri di hamber. E parti cu nos mester keda conscientisa pa hiba un bida mas saludabel mester keda primordial. Cuminsa for di chikito y keda inculca esaki den e muchanan. Sigur ta un gran parti caba cu e departamento di Agricultura, Cria y Pesca, Santa Rosa a haci, ta haci y lo sigui haci. E parti di conscientisa e ser humano pa planta su mesun berduranan cu e ta uza diariamente den su cushina mester ta e base pa hiba un bida mas saludabel. Un dieta balansa y cu productonan cu bo mes ta produci. Na momento cu bo ta come mas saludabel lo bo cuminsa sintibo mihor. Lo cuminsa funciona mas eficiente tambe. Menos cansancio, drumimento anochi miho, menos stress y asina por sigui menciona. Hopi mas persona ta keda bin dilanti cu malesanan cronico. Papiando di hendenan cu ta diabetis di cual mayoria ta den e fase avance. Sea ta diabetico, presion halto, cancer of otro sintomanan.

E parti principal di come saludabel ta beneficioso pa seguro medico di Aruba. Sigur esaki lo yuda na alivia e peso cu constantemente tin debi na mal alimentacion, obesidad y sobrepeso cu e seguro medico casi no por carga esaki mas.

Sta Rosa kier encurasha henter comunidad pa planta mas, scoge mas pa productonan produci localmente, haci mas actividad manera pisca na baranca of tuma paseonan den mondi cual ta crea actividad sano y semper sigura cu boso tin boso hofi di matanan herbal na cas, pa boso por cushina cu productonan cosecha for di boso cura.

Ministerio di Sector Primario conhuntamente cu Departamento di Agricultura, Cria y Pesca kier gradici tambe tur esnan cu diariamente ta sostene nos sector door di cumpra local. Boso aporte ta di suma importancia pa mantene nos productornan motiva.