Si tur cos ta bon, pa otro luna caba lo por cuminsa uza e pier na Rodgers Beach. Ta un proyecto cu siman pasa Minister Dangui Oduber a anuncia y cu mesora a haya un acogida grandi, specialmente di habitantenan di San Nicolas. E anuncio a causa cu mesora a rebiba recuerdonan di antes, ora cu tabata uza e pier aki cu mas frecuencia. Hopi hoben no conoce Lago Colony, como un area cera y bou control di Lago Police.
Hopi ta sinti cu e inversion aki lo embeyece e area y na mes momento lo atrae mas bishitante pa Rodgers Beach. Cu tempo mas hende a move di Rodgers Beach y Coco Beach pa Baby Beach pasobra ey tin mas movecion y actividad comercial. Por come algo y bebe algo si ta desea, mientras cu na Rodgers Beach a elimina e restaurant cu tabatin ey y ta sinti falta di sikiera un truck pa bende refresco of un ijscream.
Pa hopi, na momento cu e pier ta den uzo completo, cu mesora lo nota cu actividadnan lo muda mas pa e area ey. Landadonan lo haci uzo di e pier pa sambuya, piscadonan por sinta atardi of anochi eynan pa pisca, mientras cu botonan por pasa mara un rato pa baha hende of subi hende.
San Nicolas ta contento
Lenny Geerman ta un habitante di Lago Heights y conoce e storia di e pier di Rodgers Beach for di cabes. Ta tur ora e ta bay landa eybanda y ta considera e area como su “spot preferi”. E ta corda tempo di Lago ainda cu tabatin un jachtclub eynan. Tabatin hasta un rampa pa baha boto eybanda. Pero den tempo di Lago bo no por drenta asina sin mas, pasobra mester di un carnet pa por drenta paden. E ta corda ainda cu tabatin un brug eybanda. Awo e ta contento cu ta bay renob’e y ta spera nan lag’e manera e tabata, cu su springplank.
Trabounan di construccion a cuminsa
Randy Wouters a conta cu apenas e tin algun dia riba e trabou aki, pa renoba e pier di Rodgers Beach. “Pa otro siman lo por cuminsa mira mas movecion caba di con e trabounan ta avansando”, asina e contratista a declara. E ta kere cu, mirando cu nan tin tur e material cla, cu den tres siman mas nan lo ta cla. Nan tin 4 trahado riba e proyecto. Asina cu e ta cla, usuarionan lo por cana trankil riba dje, sea pa bay landa, pisca of pa subi boto.
Piscadonan ta masha contento cu e renobacion
“Hopi bon mes. Ta di masha tempo nos tabata wardando pa duna Rodgers Beach un bida bek”, asina Yohannes Hoftijzer, un piscado di 79 aña di edad, a conta nos para na Rodgers Beach. El a conta cu pa hopi aña a uza e pier ey pa diferente motibo, pero pa falta di mantencion poco poco el a bay atras te cu no por a uz’e mes nas. Mal tempo y horcan tampoco a yuda pa e pier por a keda den uzo normal. Esey mes a haci cu piscamento for di Rodgers Beach tambe a bay atras, pasobra Polisnan ta controla mas y mas awendia pa miedo di “mensensmokkel” via botonan di piscado. Ta spera cu awor cu keda cla cu e pier, cu por bolbe na e custumbernan di antes, den cual famianan ta pasa tempo eynan.