San Nicolas Ports Authority no ta forma ningun competencia pa APA

Por a tuma nota di un puerto cu ta intencion pa bin cun’e na San Nicolas. Esaki por ta un competencia pa APA. Minister di turismo, Dangui Oduber a comenta cu e ta vigilando e desaroyo aki.

Tur esaki ta bay den combersacion conhuntamente cu minister di transporte, Minister Chris Romero, kende a anuncia e intensionnan aki, no di awo, sino di basta tempo, pa bin cu un San Nicolas Ports Authority.

E mandatario a sigui splica cu a cuminsa cu a bin cu e intension aki na momento pa bin cu un Fast Ferry. Nan a cuminsa cu e proceso pa pensa con nan por haci esaki posibel. Un di e posibilidadnan cu nan ta explorando ta un San Nicolas Ports Authority. A informa minister Oduber e momentonan ey. A sinta na mesa cu APA y si tur cos ta bon, e siman aki lo bay tin un di dos of di tres combersacion hunto pa wak con APA lo por yuda den esaki y con por yega na un acuerdo di cooperacion.

 

E intension no ta pa nan bay competi contra otro sino e intension ta pa nan complementa otro y pesey, como minister encarga cu APA ta sirbi su interesnan. Minister Romero a pensa riba San Nicolas Ports Authority pa asina stimula trafico, stimula economia, crea movecion p’ariba di brug, cu tur su bon intensionnan. Pero obviamente mester haci palabracionnan concreto cu otro entre ministerio di turismo y ministerio di transporte. Tur dos ta papia habri cu otro y dentro di algun dia lo sinta un biaha mas, hunto cu gerencia di APA, hunto cu minister di transporte, pa asina por haci palabracionnan concreto con ta sigui sigui padilanti.

Skeptico

Den pasado a tuma nota di un preocupacion di APA. E tempo ey Humphrey Tromp a duna un entrevista y a splica cu e no ta kere den e Fast Ferry e tempo ey. Pero Fast Ferry ta algo completamente los di esaki. E vision cu gobierno tin en conhunto ta, pa un dia percura pa e cruceronan bay p’ariba di brug tambe. Na e momentonan aki, den High Season ta hopi ocupa p’abao di brug. E ta congestiona e trafico. Ti biaha tres te cu cuater crucero y no por acomoda mas. Tin peticion pa mas, pero no tin caminda pa mara nan. Pesey a cuminsa explora e posibilidad si en caso, manera tur cos ta indica cu Citgo no lo sigui, cual no tin claridad ainda. Tur esnan cu tabata di inverti den e refineria, ta cera. Tin sr. Rincon cu ta cera.

Pollo Carvajal a wordo deteni na Madrid. E Keyplayernan ta cera na e momentonan aki. E capital cu tabata di wordo inverti pa realisa e reapertura no tey na e momentonan aki. E contract no lo yega su fin. E ora gobierno lo tin chens pa kibra e contract aki. E ora e tereno ta bin bek den man di RDA di gobierno. E ora como gobierno ta bay dicidi kico ta bay haci cu full e tereno, cual ta un bunita oportunidad, por ta pa bin cu un otro tipo di desaroyo. Lo keda obviamente explora e posibilidad pa bin cu un refineria. No ta facil si, segun minister Oduber. Den e situacion economico cu tin na Venezuela pa por haya un partner pa tuma over e refineria, obviamente ta keda cu e speransa cu un dia esey por bira un realidad. Pero ya caba tin cu cuminsa pensa si den alternativanan cu si en caso bo no ta bay logra pa haya un partner cu ta confiabel cu tin e capital pa inverti, pa haci e reapertura un realidad. E ora mester pensa kico mester haci su e tereno aki keda disponibel. Vooral e tereno di waf cual ta un area hopi bunita, mescos cu tin e waterfront area na Playa, tin un area cu por bin cu henter un desaroyo economico nobo.

Den e caso ey minister Romero a bisa pa bin cu e Fast Ferry, bin cu San Nicolas Ports Authority, y un dia bay cu e cruceronan, no esunnan di p’abao, sino esunnan adicional cu kier bin Aruba, docknan p’ariba di brug. Den e caso aki e no ta bay afecta APA. Tur trahado por ta trankil den e caso aki. Tin bon contacto cu gerencia di APA. Tin bon comprondemento cu Minister Romero y hunto minister Oduber ta sigur lo sali afo tambe conhunto den un conferencia di prensa, cu si esaki bira realidad un dia, bao ki condicion ta haci esaki. Ta importante pasobra APA na e momentonan aki tin e exclusividad riba e awanan teritorial di Aruba. Kiermen den caso si ta papiando di un San Nicolas Ports Authority, mester yega na un comprondemento cu otro, bao di ki condicionnan ta bay uza e awanan teritorial na e momentonan aki, ta exclusividad di APA.