Recientemente a tuma nota cu Prome Minister di Aruba, mr. Evelyn Wever-Croes a anuncia cu Hulpbestuurskantoor (HBK) San Nicolas lo muda pa un localidad temporal. A anuncia cu lo muda pa e edificio di RdA te ora cu renoba e edificio original di HBK San Nicolas. Ainda por corda cu Parlamentario di MEP, Alvin Molina a cuestiona ora cu HBK a muda pa MFA Saventa, saliendo na defensa di e pueblo di San Nicolas. E tempo ey, el a menciona cu un papel di 5 florin di Censo lo costa e pueblo di San Nicolas 10 florin. Su ponencia no a cay den bon tera den su partido. Su propio lider di partido y alabes prome minister, a sali y purba desbarata e punto di Molina.
Awo a yega na un solucion temporal. E presidente di San Nicolas Business Associtation, Errol de Freitas a duna di conoce cu e ta contento cu San Nicolas por yega na beurt di por bay ricibi su propio MFA, anto renoba bunita manera tur otro. De Freitas a enfatisa si cu; e ta spera cu e renobacion no dura pa largo y cu e ta keda pa un periodo limita. Di otro, prome minister a indica cu gobierno ta sondeando fondo pa por drecha e edificio. No kier traha cu SOGA pa por keda paga huur pa un periodo largo. Lo purba di tur manera pa cu fondo di Pais Aruba mes, renoba e edificio. Ta cuestion di keda pendiente pa mira cuanto tempo e renobacion aki lo tuma.
