San Nicolas Business Association riba situacion na Baby Beach: Tin mester espacio pa mas desaroyo

Den fin di siman a tuma luga un situacion menos bunita pa por lo menos un famia humilde cu ta trahando duro na San Nicolas. Ta trata aki di famia Raven. Nan tin mas cu binti aña cu nan negoshi Big Mama Grill na Baby Beach. Diripiente un funcionario di DIP a sorprende nan cu un bishita informando nan cu pronto tin cu desmantela e negoshi riba beach. DIP ta parce cu ta ocupa cu cosnan menos importante. Na un otro restaurant na entrada di Sero Colorado tambe tabatin un situacion caminda cu propietario di un restaurant tabata pidi un expansion di tereno pero DIP no tabata ni reacciona. E tempo ey a mira hasta un parlamentario di e fraccion MEP a bay cana cu e propietario den mondi pa inform’e cu e lo purba yud’e.

A acerca presidente di San Nicolas Bussiness Association pa un reaccion riba e situacion aki. Errol de Freitas a informa cu; tin mester mas espacio pa mas desaroyo. Tin cu reorganisa y structura Baby Beach pa e pueblo, segun e presidente. SNBA ya a sugeri na gobierno pa un posibel solucion pa tur partido. E propietario tin cu ta habri pa yega na un ‘relocation’ responsabel. Errol de Freitas a confirma cu no ta trata di kita di yiu di tera pa duna stranhero, ningun rato so. Tur cos ta pa expansion pa mas desaroyo na San Nicolas.