Pa loke ta e cifranan, dokter Maritza Ordoñez di Salubridad Publico a splica cu ta keda circula cu nos tin sangura. Por ehempel algun luna atras tabata medio seco y no tabata yobiendo. Awor aki, cu cay un tiki awa, cualkier criadero cu tabata wardando un drop di awa, probablemente sangura lo cuminsa broei.
Si berdad ta keda haya notificacion y melding di sospecho di dengue, zika y chikungunya. Tin cu agrega cu tin un protocol, pa e muhe na estado cu zika. Dentro di algun dia, lo yama prensa completo pa por haci un reunion hunto cu e ginecologo, parteranan, e neonatologonan y salubridad publico, pa splica kico ta e contenido di e protocol. Tin un protocol cu ta dirigi specificamente pa muhenan na estado riba zika. Den e resto ta sigui traha riba dje. E plan di accion cu GKMB tin ta fabuloso, segun Ordoñez.
Meldingnan ta keda drenta
E meldingnan ta keda drenta mescos. E persona cu ta bay su dokter di cas, e dokter di cas ta haci su diagnostico diferencial, por ta un of otro dengue, chikungunya y zika, dependiendo di esey, ta manda meld na departamento di malesa contagioso. Eynan ta tuma contacto cu e persona of e cas, trabao of scol y ta haci un intake. For di eynan e informacion ta bay epidemiologia y nan ta haci un follow up di cuanto melding ta hayando y haya resultado di e testnan di laboratorio.
E ta keda circulando, pero no awor aki cu por bisa cu tin un alerta. Semper Zika, dengue y chikungunya lo keda den nos comunidad, door cu nos tin e sangura.
Caso fatal?
No tin ningun caso fatal. Si tin algun caso presentando muhenan na estado cu zika, pero te awor aki, ningun ta presenta ningun complicacion, ni muestra cu lo bay nace un baby cu microcefalia. Ta keda super vigilante riba dje si. Tin bon contacto cu e neonatologonan, cu e ginecologonan, partera y hasta cu e dokter di cas y hospital, manera cu ta sigui vigila di cerca cualkier evento cu por sosode cu microcefalia.
