Saladin vs Maduro: Bo ta abusando di prijsnan!

Aunke cu ta acepta cu berdad algun comerciante a abusa di e situacion, toch no ta aprecia ni aproba cu Minister mr. Xiomara Maduro a dicidi pa unilateralmente impone un prijs maximo riba un lista di productonan relaciona cu Coronavirus. Ta cataloga esaki awo como un abuso net contra e comerciantenan cu no a abusa! 

Francis Saladin ta director di Frasa Trading y ta un di e voceronan di Comerciantenan Uni. E ta conoci pa no sa sconde su opinion, sea cual sea e Gobierno na mando. Tambe entretanto por deduci cu Minister Xiomara Maduro no ta su Minister “preferi” tampoco, probablemente debi na e hecho cu e ta sinti falta di participacion real di e gremio comercial den tumamendo di decisionnan cu ta afecta nan forma di maneha nan negoshi. 

Relaciona cu e anuncio di prijs maximo riba un lista adicional di producto cu ta hopi den demanda durante e crisis aki, el a bisa ayera “Cu e porcentahe aki mi no por ni cubri mi gastonan operacional y mucho menos di personal. Abo (referiendo na e Minister) ta bay paga mi cuenta di coriente di e freezer cu mi no por dal paga? Abo ta bin Frasa mañan y splica mi trahadonan cu danki na Bo decision, sin consulta cu nos, awo lo bay sufri mas consecuencia?”

Francis Saladin a sigui bisa mas leu cu “Mi tin comprension cu e situacion no ta facil y lo tabata full dispuesto pa coopera, aunke nos NUNCA a abusa! Lastimamente esaki ta Bo manera semper di haci cos, It’s my way or the highway”.Saladin ta premira cu e decision di Minister Maduro lo haci’e dificil pa sigui importa e productonan aki pasobra con lo mester splica banco cu ta uza nan overdraft facility pa importa productonan cu lo perde placa riba dje.

“Ta bira ora bo cuminsa tuma nos na serio! Mi a propone pa elimina BBO riba tur cuminda den a tempo aki pa e Coronavirus, PERO ESEY SI BO NO TA HACI!  BO TA KEDA SUTA PUEBLO CU BBO CUMULATIVO!”, asina e comerciante a termina su critica. 

Pero awe mainta no a habri diferente. Por lo menos Francis Saladin a vocifera cu “Awe mainta 19 di Maart ta un dia hopi tristo pami.  Despues di un dia tristo caba unda nos ta maak mee un 18 di maart nunca bisto. Envez di lanta pa bay guera contra e virus mi ta hayami ta bay guerra cu mi Gobierno cu enbez di bisami con e ta bay yudami, ta tuma medida contra mi compania y nos empleadonan sin ningun momento consulta”. 

E comerciante conoci den e mundo di “Wholesaler” ta acusa Minister Xiomara Maduro di Asuntonan Economico y Finansa di “Bo kier sigui gana invoerrechten y BBO cumulativo den e situacion aki! Bo ta un abusado e ora ey! Awe mi ta bringa dos virus! CO-VOD-19 y Minister Xiomara Ruiz-Maduro. Pueblo ta reacciona masalmente ora un Chines abusa di prijs. Pero awe mi ta spera pueblo realisa ken ta e abusado di mas grandi!”, asina Francis Saladin a termina bisando den un tono rabia y disgusta.