SADA, SIMAR y SPA a bay den un reunion di urgencia riba e forma unilateral con Gobierno den forma unilateral a kita 5% for di ambtenaarnan.
Edward Maduro di SADA a splica cu nunca a bay na mesa bek cu Gobierno riba e forma con ta bay kita e 5%. Mas ainda pasobra ta papia di “tot nader orde” cu ta laga un espacio habri pa cuanto tempo e medida lo dura. E no ta bay pa si ta solidario of no pero mester bay cu respet y mester wordo carga door di e cuerpo di ambtenaarnan.
Jose Dirksz di SPA a bisa cu nan a reuni pa “brainstorm” con ta bay pa atende e asunto aki, pasobra nan no ta di acuerdo cu e forma con a tuma e decision. No ta berdad cu Gobierno a yega na un acuerdo cu e sindicatonan. “Awe mas cu nunca sindicatonan ta bay uni un front pa atende cu e problema aki,” Dirksz a bisa.
SIMAR
SIMAR tabata presente den e reunion y Josephine Albertus a bisa cu a sinta cu crisis team, y a bisa nan cu mirando tur esfuerso cu ta haci pa habri scolnan den forma di 50% pa despues tende cu nan ta papia pa e scolnan habri den 100%. Nos kier pa e scolnan habri den forma responsabel.
Nos ta compronde cu scol mester habri cierto momento. Tene cuenta si cu docentenan ta trahando riba tur cos pa ta bon prepara. Pa habri scol riba 50%, tin docentenan a traha weekend, a hinca hopi tempo, saca placa di nan mesun saco pa haci cierto preparacion. Awo un siman despues ta papia di ta habri 100%. Esaki siendo cu a traha un plan, den cual a hinca hopi tempo, con ta bay funciona den forma di 50%,” Albertus a bisa. E no ta compronde di con no ta sinta consulta cu maestronan. Esaki y e asunto di kita e 5% den forma unilateral ta demostra cu no tin claridad ni transparencia riba diferente tema.
Kico cu bay pasa awo, ta depende di e miembronan. Hecho ta cu SIMAR a papia cu e docentenan di e diferente scolnan, pa evalua kico e veld kier.
