SADA no ta contento cu tin nombracion contra ley den Cuerpo di Aduana

Mirando e embergadura di loke cu sindicato SADA a trece p’adilanti, a haya ta na su luga pa no yama un reunion extra ordinario, sino yama un rueda di prensa, pa asina informa pueblo kico ta pasando.

E gobierno aki, desde cu nan a sinta nan ta promoviendo integridad den e aparato gubernamental, unda cu te hasta a bin cu un Bureau Integriteit Aruba.

Conferencia di prensa Sindicato SADA disgusto den cuerpo pa nombracion contra ley

Posted by 24ora on Friday, March 8, 2019

Segun presidente di SADA, Edward Maduro, algun siman atras a bin haya tende cu aparentemente un colega lo a haya un promocion pa un rango di douane cu eigenlijk ta rekeri un diploma academico.

Ora cu a bin tende di e rumor aki, a cuminsa haci nan investigacionnan y a cuminsa busca pa wak si en berdad esaki ta cuadra. No por djis tras di rumornan, pero mas bien ta sigui tras di hechonan.

A acerca prome minister presidente riba esaki. A informe cu tin informacion cu cierto cosnan a sosode y tambe a informa DRH. Aki a bin haya confirmacion verbal di DRH cu en berdad un landsbesluit a sali pa promove un colega di Aduana pa un rango di inspector, cual ta un rango mas halto di e sistema di e cuerpo.

Notabel ta di esaki cu e persona cu a haya e rango aki, no ta dispone di un diploma academico. E ta un rango cu un di e exigencianan pa bira un inspector di aduana, mester tin un diplma academico den su poder. Den ningun otro manera por haya e rango aki, bij keuze of como un promocion debi na añanan di servicio.

SADA no a para keto. Nan kier haya e landsbesluit y tur otro documentonan den nan man pa bin cun’e afo y mustra cu aki leiding, specificamente e director ta trapando riba ley. E ta trahando contra integridad, di cual ta algo cu a bin ta mustra for di hopi tempo caba, cu e confiansa den e director aki no ta existi mas.

Por corda aña pasa durante un accion cu tabata tin na November, unda cu tur e coleganan cu tabata tey presente na e reunion aki, a presenta un mocion di desconfiansa contra di e director aki, mirando cu e ta falta di integridad.

Ora cu a bin haya e landsbesluit aki den nan poder, no por a kere con gobierno, pasobra con cu bay bin un landsbesluit tin su proceduranan pa caba. Aki ta caminda SADA ta bisa cu algo a bay robes y hopi robes den opinion di e sindicato.

Por a skip un of dos control, pero tur e controlnan, esaki ta pone cu e sindicato tin yen di interogante kico a bay robes. No ta papia aki di un hende so cu kisas ta culpabel, cual ta esun cu a percura pa e promocion aki tuma luga. Pero aki ta papiando di varios hende.

Lamentabel ta cu ora cu a bay haya sa mas leu y a bin haya te hasta un peticion di director cu a wordo manda dia 22 di Juni 2017, apenas algun luna prome cu eleccion. Ya caba esaki ta un redflag hopi grandi, segun Maduro. Ta duna di conoce cu lo a purba busca un nombracion politico, pasobra hopi straño cu ta warda net dos luna prome cu eleccion pa dien in un peticion hopi swak, pasobra e ta un peticion cu ta conta bida di un persona durante su trayectoria den Aduana, pero nada pisa pa por bin na un rango di inspecto y ta push’e bao di nanishi di e minister, apenas dos luna prome cu eleccion.

Ta duna di conoce cu bo tabata buscando un promocion politico pa un colega. Pasobra e director ta na un caminda cu e no por haya esaki. Pero pa haci esaki pa un persona, ta duna di pensa cu esaki tabata meramente pa busca un nombracion politico.

Tin cu remarca tambe, cu en berdad na 2017, SADA a haya informacion di DRH cu director di Aduana a manda pidi, no na un ocasion, sino na dos ocasion, e posicion di inspector pa e persona aki. DRH a sigura cu nan a duna negatief advies pa e persona aki, mirando cu e persona aki no ta dispone di un diploma academico.

A puntra DRH si por haya e posicion aki sin diploma, cual nan a contesta cu no por. Apesar cu e director a purba di haci e persona aki bunita, DRH a duna negatiev advies.

A puntra e minister si dado caso e haya un peticion asina, el a duna di conoce mesun cos, cu sin diploma universitario, un hende no por haya e rango di inspector.

SADA a keda cu bista y cada bes ta purba di vigila, mira si dado caso toch esaki por sigui cana su caminda. Si un director ta manda un peticion y a haya un negatief advies di DRH y ta bolbe manda un peticion, ya caba nos tur sa unda ta bayendo aki.

Lamentablemente, apesar cu SADA a purba di tin vigilancia riba esaki, a bin tende algun siman pasa cu dicho landsbesluit cu promocion, a pasa.

Kico a pasa, no ta conoci. SADA sa cu DRH en principio a duna negatief advies. Ta haya dos biaha caba un afwijzing di e peticion, con ta sigui pusha contra ley pa un persona haya un promocion. Aki ta caminda cu SADA ta lamenta esaki barbaramente.