E Sindicato di Aduanero di Aruba (SADA) den un email na su miembronan awe a confirma cu nan ta bay di acuerdo cu e peticion di Gobierno pa rebaha salario di Duaneronan temporalmente cu 5% y reduci vakantie-uitkering na augustus y november cu 50%. Pero, prome cu e Duaneronan aproba un reduccion di nan salario y beneficionan, nan a presenta mesora un lista di condicionnan pa Gobierno tambe haci e mesun “huiswerk” den cas, prome cu mishi cu salario di empleadonan publico.
E lista ta inclui:
- Reduccion di salario di Ministernan cu un minimo di 15%, mientras cu Parlamentarionan mester baha di nan cu 10%. Ambos Minister como Parlamentarionan mester entrega TUR “toelage” y ta exigi pa nan tambe entrega 50% di nan vakantie-uitkering. Ta exigi pa reduci e “Overbruggingstoelage” cu 50% te cu 31 di december 2021.
- Coordinadornan cu ta empleado publico, pero na disposicion di Ministernan, mester entrega nan “toelage” di 25% di aumento riba nan salario mensual. Nan lo mester keda cobra nan salario original como empleado publico.
- Coordinadornan (tambe bode) cu NO ta empleado publico, mester baha nan salario cu 30% pa luna. Y esunnan cu a alcansa edad di pensioen y cu ta cobrando esey caba pa luna (por ehempel ex Ministernan) lo mester traha GRATIS, pues SIN cobra ningun salario adicional.
- Tur Director y Hefenan di departamentonan di Gobierno, cu awor ta gosando di 25% extra tur luna riba nan salario, mester entrega esaki bek mesora.
- Empleadonan publico cu ta “ter beschikking” mester entrega 5% di nan salario mensual. Pa nan tambe (mayoria ta coordinador di Minister) ta conta cu mester baha tur vakantie-uitkering cu 50%.
Separa di e lista di exigencia, e sindicato ta puntra Minister Presidente cuanto e companianan estatal, manera SETAR, WEB Aruba NV, NV Elmar, Utilities Aruba NV, Post Aruba NV, Aruba Tourism Authority, SVb, Aruba Ports Authority, Aruba Airport Authority NV, Refineria di Aruba NV, ANSA NV, SERLIMAR y tur otro mas, lo “entrega” na salario y beneficionan tur luna. No por ta asina cu den Gobierno e reduccion ta diferente na companianan priva di Gobierno.
E sindicato ta desea di haya sa di Gobierno cuanto placa di belasting tin riba caya. Nan a tende cu ta 1.6 biyon florin. Kier sa kico ta e plan pa cobra e placa aki bek.
SADA ta puntra con Gobierno tin pensa di paga e sacrificio cu e Duaneronan ta haciendo aki bek den futuro. Ta pesey ta importante pa sa pa cuanto tempo Gobierno di Hulanda lo sigui subsidia salarionan na Aruba. Kier sa con lo haci cu e belasting cu e Duaneronan a paga caba riba nan “vakantie-uitkering” awor cu a bahe na mita. Lo mester debolbe placa di belasting cu nan a paga di mas na Gobierno.
Pa e Duaneronan ta importante pa nan sa dicon Gobierno di Hulanda no kier yuda Aruba cu un subsidio, sino cu un fiansa. Den e mesun rosea, SADA ta adverti Gobierno for di awor caba, cu dado caso cu Hulanda no acepta e pakete di medida aki y exigi pa corta mas, pa Gobierno no bin mas na e empleadonan publico, mirando cu tin otro caminda mas pa Gobierno “spaar”.
Por ultimo a sugeri e prome mandatario pa stop tur promocion (bevordering), tanto esunnan den proceso como tambe casonan nobo, cuminsando desde 1 di mei 2020 te cu 31 di december 2021, pa evita posibel promocionnan ilegal.
