Directiva di Sindicato SADA a reuni awetardi despues di a haya e decision temporal di Corte, conoci como un “ordemaatregel”, den cual ta prohibi Duaneronan pa tene cualkier tipo di accion relaciona cu e topico di cambio di orario di warda, te ora bin un decision den e caso sumario. E sindicato no a aprecia e forma di traha aki di Minister di Finansa, Asuntonan Economico y Cultura, mr. Xiomara Ruiz-Maduro.
Presidente di SADA, Edward Maduro a expresa cu e Duaneronan awor ta mas rabia cu nunca. E decision di Hues a bini di sorpresa pa nan.
Esaki ta e balor cu Minister ta duna su trahadonan
Mas leu e sindicalista a expresa su disgusto pa e hecho cu Minister no ta duna nan oido, pero ta prefera di tene un conferencia di prensa y bisa yen di cosnan cu no ta cuadra cu berdad. Y sin sinta na mesa pa negocia, ta opta pa tuma e caminda di Corte contra su mesun trahadonan. E acto aki SADA ta haya masha lamentabel.
Gana of perde e caso, a haci un daño ireparabel na Cuerpo di Aduana
Edward Maduro a subraya e realidad cu e ultimo 10 añanan, esaki ta di 4 of 5 bez cu e tema aki ta subi riba mesa. Gobierno anterior a laga traha rapport riba e tema y a yega na solucion. Gobierno a cambia y a bin Minister di Finansa nobo, ata awo ta bolbe habri e mesun discusion, pero e biaha aki sin tene cuenta cu e rapportnan existente.
Nunca den pasado negociacionnan a yega dje leu aki
Pa awor e sindicato cu ta representa Duaneronan ta enfoca riba e caso sumario di diahuebs awor. Nan ta sigur cu nan lucha y tin tur confiansa cu Corte lo tene nan puntonan na consideracion.
