SADA kier mas proteccion pa Duaneronan na Aeropuerto

Ayera mainta, riba e vuelo for di Bogota cu Avianca, a yega un turista cu menos bon intencion. Ora a pasa su maleta den e scanner, e Duanero a descubri un arma di candela. Ora a habri’e a topa cu un pistol Magnum di 9mm semi automatico mas 50 bala cayente. Ta sospecha cu e persona ta un sicario cu a yega cu meta pa likida un hende. Duana a detene y a pas’e pa Polis, cu lo sigui cu mas investigacion. 

E asunto a causa cu e Duaneronan no ta sinti nan mes sigur mas y Sindicato SADA a dicidi di manda un carta via nan consehero legal pa Director di Departamento di Aduana, pa Minister Presidente y pa Minister di Finansa. Den e carta e sindicato ta pidi pa atencion urgente di e mandatarionan relaciona cu proteccion di su miembronan trahando specialmente na Aeropuerto. 

E detencion e biaha aki a bay bon, pero e por a bay completamente diferente tambe, si e pasahero a habri su maleta, saca e arma di candela y cuminsa tira riba tur hende.

Ta pesey Sindicato SADA ta pidi pa: 

1. Cambia e glas “frosted” na e compartimento di Aduana na Aeropuerto pa glas normal. Asina e Duaneronan tin un miho bista di e pasaheronan for di momento cu nan ta buscando nan maleta caba. Tambe asina tin miho bista riba e area di control di maleta. 

2. Percura pa Duaneronan na Aeropuerto ta carga arma di candela tambe pa por defende nan mes contra tipo di situacionnan peligroso asina.


E consehero legal, via bufete di abogado James Martin & Associates, a informa Gobierno cu den un siman di tempo ta spera accion y contesta riba e peticion urgente di su cliente, esta sindicato SADA.